नेपाल कांग्रेसले आसन्न आम निर्वाचनका लागि घोषणा पत्र तयार गरेको छ। प्रदेश र प्रतिनिधिसभा चुनावका लागि कांग्रेसले तयार पारेको ८४ पृष्ठ लामो घोषणापत्रमा एमालेलाई राष्ट्रिय एकताको बाधक र माओवादीलाई लाभ खोज्ने अवसरवादीको संज्ञा दिएको छ।
वाम गठबन्धनप्रति निकै कठोर आक्रमण गर्दै कांग्रेसले कम्युनिष्टहरुलाई ‘हत्यारा र राज्य आतंकका पक्षपाती’ को संज्ञा दिएको छ। कांग्रेसले ०४८ को चुनावी नाराको झल्को दिंदै घोषणापत्र तयार पारेको छ। कांग्रेसले घोषणापत्र मंगलबार सार्वजनिक गर्दैछ।
०४८ मा ‘कम्युनिष्टहरुले जिते ६० वर्षमाथिका बुढाबुढीलाई मार्छन्’ भन्दै भोट मागेको कांग्रेसले झन्डै २६ बर्षपछि पुन: उस्तै चुनावी नारा दिएको छ। ‘कम्युनिष्टहरु लोकतन्त्रलाई उपयोग गरेर साम्यवाद ल्याउने चेष्टा गर्छन्’ कांग्रेसले भनेको छ, ‘कम्युनिष्टहरु शान्तिका पक्षधर हुँदैनन्- तिनले हिंसा, व्यक्ति हत्या र राज्य आतंक सिर्जना गर्ने गर्छन।’
एमाले राष्ट्रिय एकताको बाधक
कांग्रेस एमाले प्रति निकै कठोर देखिएको छ। कांग्रेसले एमालेलाई राष्ट्रिय एकता र सम्बृद्धिको वाधक भनेको छ। एमालेले मधेस आन्दोलनलाई विखण्डनको आन्दोलन भन्दै अशोभनीय टिप्पणी गरेको र अहिले अतिवाद एवं नक्कली राष्ट्रवादको पासोमा पर्दै गरेको कांग्रेसको भनाई छ।
माओवादी लाभ खोज्ने अवसरवादी
कांग्रेसले माओवादीको बारेमा समेत कठोर टिप्पणी गरेको छ। माओवादीमा अस्थिर राजनीतिको लाभ खोज्ने अवसरवादी प्रवृत्ति देखिएको कांग्रेसको विश्लेषण छ। प्रचण्ड नेतृत्वको माओवादी अस्थिर राजनीतिक समीकरण, सत्ता स्वार्थको गठबन्धन, वैचारिक अस्पष्टता र असफलताको केन्द्र बनेको कांग्रेसको विश्लेषण छ।
मधेश केन्द्रित दल संवाद र सहकार्यको बाटोमा
कांग्रेस मधेश केन्द्रित दल प्रति नरम देखिएको छ। तराई मधेशको भोट तान्न मधेश केन्द्रित दलसंग सहकार्य गर्ने 'तानाबाना' बुनेको कांग्रेसले मधेस केन्द्रित दल सम्बाद र सहकार्यको बाटोमा रहेको विश्लेषण गरेको छ।
राप्रपा (प्रजातान्त्रिक) र राप्रपा नेपालसँग विश्वसनीय सहकार्य
देशको नयाँ संविधान प्रतिको गम्भीर प्रतिबद्धता तथा लोकतन्त्रका विश्वव्यापी मूल्य–पद्धति माथिको विश्वास नै नेपाली कांग्रेस तथा राप्रपा (प्रजातान्त्रिक) एवं राप्रपा नेपालको सहकार्यको आधार रहेको कांग्रेसको विश्लेषण छ।
कम्युनिष्टले जिते अस्थिरता र भ्रष्टाचार बढ्ने दाबी
कम्युनिष्ट गठबन्धन निर्माण गर्ने प्रयासले नयाँ संविधानका उपलब्धि, आर्थिक प्रगति, राष्ट्रिय एकता र सामाजिक सद्भाव जोखिममा परेको कांग्रेसको दाबी छ ।
कार्यकारी राष्ट्रपतीय प्रणालीले स्थिरता ग्यारेन्टी नगर्ने भन्दै कांग्रेसले भनेको छ, ‘संसदमा कम्युनिष्टहरुको वर्चश्वले स्थिरताको ग्यारेन्टी गर्दैन । देशलाई निरंकुश कम्युनिष्ट शासनतर्फ लैजाने र द्वन्द्व सिर्जना गर्ने खतरनाक प्रयोग मात्र हुन सक्छ ।’
कम्युनिष्ट सरकारले राष्ट्रिय/अन्तराष्ट्रिय लगानी घट्ने र पूँजी पलायन हुने कांग्रेसको दाबी छ । एमाले र माओवादी सुनियोजित तवरबाट संस्थागत भ्रष्टाचारलाई संरक्षित गर्ने पार्टी प्रमाणित भएको कांग्रेसले घोषणापत्रमा दाबी गरेको छ।
'सत्ता र स्वार्थको यो कम्युनिष्ट गठबन्धनको पनि नेपाली कांग्रेसले डटेर सामना गर्नेछ तथा लोकतन्त्र र आर्थिक समृद्धिका लागि निजी क्षेत्रको उत्साहपूर्ण भूमिका र क्षमता तथा सामाजिक न्याय र समतामूलक विकास सहितको लोकतान्त्रिक समाजवाद स्थापनाको अभियानलाई अवरुद्ध हुन दिनेछैन' कांग्रेसले घोषणापत्रमा उल्लेख गरेको छ।
वृद्धभत्ता बढाउने, राज्यलाई भ्रष्टाचारमुक्त बनाउने
०४८ को चुनावमा ‘कम्युनिष्टहरुले जिते ६० वर्षमाथिका बुढाबुढीलाई मार्छन्’ भनेर भोट बटुलेको कांग्रेसले अहिले त्यहि बुढापाकाहरुलाई फकाउन बृद्धभत्ता बढाउने सपना बाडेको छ।
नेपाली कांग्रेसले जेष्ठ नागरिकको सामाजिक सुरक्षा भत्तामा उल्लेख्य वृद्धि गर्ने बाचा घोषणापत्रमा गरेको छ । प्रत्येक स्थानीय तहमा जेष्ठ नागरिक सेवा आश्रम बनाउने र आवास, भोजनदेखि सबै सेवा निःशुल्क उपलब्ध गराउने बताएको छ ।
साथै कांग्रेसले नेपाली समाज र राज्यलाई भ्रष्टाचारमुक्त बनाउन संकल्प पनि व्यक्त गरेको छ । अख्तियार, सतर्कता केन्द्रलाई प्रभावकारी बनाउने, भ्रष्टाचारमुक्त समाज बनाउन सामाजिक-राजनीतिक अभियान चलाउने उसले बताएको छ । राजनीतिक भागवण्डाका आधारमा राजनीतिक तथा संवैधानिक नियुक्ति गर्ने प्रचलन रोक्ने बाचा पनि कांग्रेसले आफ्नो घोषणापत्रमा गरेको छ ।
कांग्रेसको विकास दृष्टि र लक्ष्य: अबको १० वर्षमा नेपाल