बिहिबार दोस्रो चरणमा निर्वाचन हुने ४५ जिल्लामा शान्तिपूर्ण रुपमा मनोनयन दर्ता सम्पन्न भएको छ । दोस्रो चरणमा निर्वाचन हुने ४५ जिल्लाका प्रतिनिधिसभातर्फ १२८ निर्वाचन क्षेत्र र प्रदेशसभातर्फ २५६ निर्वाचन क्षेत्रमा बिहिबार मनोनयन दर्ता भएको हो ।
यसैबीच काभ्रेमा एक जना दृष्टिबिहीनले पनि उम्मेदवारी दर्ता गराएका छन् । क्षेत्र नम्बर १ (ख) बाट दृष्टिबिहीन सुरेश धितालले प्रदेशसभा निर्वाचनको लागि स्वतन्त्र उम्मेदवारी दर्ता गराएका हुन् । धुलिखेल नगरपालिका ११ पात्लेखेतका निवासी ४६ बर्षिय सुरेस प्रसाद धितालले उम्मेदवारी दर्ता गराएका हुन । उनको प्रस्तावक र समर्थकमा उनकै दुर्गा धिताल र बोधनाथ ढुंगाना रहेका छन् । ढुंगाना स्वयं पनि अपांगता भएका व्यक्ति हुन् ।
मनोनयन दर्तापछि छोटो प्रतिक्रिया दिदै धितालले अपाङ्गहरुको हक हितका लागि आफुले उम्मेदवारी दिएको बताए । विभिन्न राजनीतिक परिवर्तन देखेका उनले देश प्रजातन्त्र, लोकतन्त्रबाट गणतन्त्रसम्म आइपुग्दा समेत अपाङ्ता भएका व्यक्तिहरूले अधिकार र न्याय नपाएको गुनासो गरे। त्यहि अधिकार प्राप्तिका लागि उम्मेदवार दिएको उनले बताए ।
हजारौको संख्यामा रहेका आफू जस्ता अपाङ्गहरू र उनीहरूका परिवार आफन्तलाई बुझाउन सकें आफुले चुनाव जित्ने दाबी धितालले गरेका छन्। २५ बर्षको उमेर देखि दृष्टिबिहीन भएका धितालले आजैबाट अपाङ्ग परिवार र आफन्त लाई भेटेर निर्वाचन प्रचार प्रसार सुरु गर्ने बताए ।
यस प्रदेश सभा क्षेत्रमा पुरुष ३३,८७५, महिला ३३,६१६, तेश्रो लिंगी १ गरी ६७,४९२ मतदाता रहेका छन् ।