मध्यपुर थिमि–२, सानोथिमिस्थित मनोहरा फाँट नजिकै ट्याक्सीभित्र हत्या गरिएको अवस्थामा फेला परेको शवको पहिचान भएको छ । दिव्यश्वरी जग्गा एकीकरण आयोजना क्षेत्रभित्र बा१ज १०४० नंको ट्याक्सीभित्र फेला परेको शव सर्लाही घुर्कौली घर भई हाल ललितपुरको कुसुन्ती बस्ने ४९ वर्षीय यज्ञबहादुर खड्काको भएको खुल्न आएको हो ।
मनोहरा फाँटमा रोकीराखेको सेतो रंगको ट्याक्सीको पछाडि सिटमा खड्काको शव फेला परेको हो । रातो हुकभित्र हरियो भेस्ट र खैरो पाइन्ट लगाएका खड्काको अनुहारमा चिन्न नसकिने गरी चोट लागेको छ । खड्काको अनुहारमा ढुंगाले हानेको जस्तो देखिएको प्रहरीको भनाइ छ ।
घटनाको जानकारी प्राप्त हुनासाथ महानगरीय प्रहरी परिसर भक्तपुरका प्रमुख प्रहरी उपरीक्षक किरण राणाको नेतृत्वको टोली घटनास्थल पुगेर अनुसन्धान थालेको परिसरका प्रवक्ता प्रहरी नायब उपरीक्षक कृष्ण प्रसाईंले जानकारी दिए ।
घटनाका सम्बन्धमा अपराध महाशाखाको टोलीले समेत अनुसन्धान थालेको छ । शवको मुचुल्का तयार गरी अहिले शवपरीक्षणका लागि त्रिवि शिक्षण अस्पताल पठाउने तयारी भइरहेको छ ।
