फाइल फोटो
प्रधानमन्त्री शेरबहादुर देउवाले डाकेको ५ राष्ट्रिय पार्टीको सर्वदलीय बैठक सकिएको छ । पछिल्लो राजनीतिक घटनाक्रम बारे छलफल गर्न देउवाले प्रधानमन्त्री निवास बालुवाटारमा बैठक डाकेका थिए ।
बैठक राष्ट्रियसभाको निर्वाचन, नयाँ सरकार गठन , प्रदेश प्रमुखहरुको नियुक्ति र प्रदेशहरुको अस्थायी राजधानी तय गर्ने विषयमा केन्द्रित भएको थियो ।
बैठकमा एमाले उपाध्यक्ष भीम रावलले सरकारले विभिन्न बहानमा सरकार लम्वाउने काम गरेकोमा आक्रोश पोख्दै चाँडो भन्दा चाँडो नयाँ सरकार निर्माण गर्ने बाटो खोल्न प्रधानमन्त्रीलाई आग्रह गरेका थिए ।
त्यस्तै नेकपा माओवादी केन्द्रका नेता नारायणकाजी श्रेष्ठले भने सरकार काम चलाउ भइसकेकाले नीतिगत निर्णयहरु नगर्न सुझाव दिए ।
बैठकपछि कांग्रेस बरिष्ठ नेता रामचन्द्र पौडेलले प्रदेश प्रमुख र राजधानी तथा राष्ट्रिय सभा निर्वाचनबारे अन्य दलबाट कुनै सुझाव नआएको बताए।
सरकारले आज बस्ने मन्त्रिपरिषद बैठकबाट यी तीनवटै विषयमा निर्णय गर्ने तयारी गरेको छ ।
बैठकमा कांग्रेसबाट प्रधानमन्त्री देउवासहित नेताहरु रामचन्द्र पौडेल, विजय गच्छदार, सशांक काेइराला ,कृष्णप्रसाद सिटौला उपस्थित थिए। एमाले अध्यक्ष केपी ओली भने बैठकमा गएनन् । एमालेबाट पूर्वसभामुख सुवास नेम्वाङ, उपाध्यक्ष भीम रावल, पूर्वमन्त्री विष्णु पौडेल र अग्नी खरेल सहभागी थिए।
बैठकमा राजपा अध्यक्ष मण्डलका महन्थ ठाकुर, अनिल झा, महिन्द्र राय यादव, राजकिशोर यादव सहभागी थिए। त्यस्तै फोरमबाट राजेन्द्र श्रेष्ठ लगायत नेता बैठकमा थिए।
