सर्वोच्च अदालतले आफ्नो अवहेलना मुद्दामा वरिष्ठ चिकित्सक प्रा डा गोविन्द केसीसँग आज बयान लिएको छ ।
अवहेलना मुद्दामा पक्राउ गरी आज बिहान अदालतमा उपस्थित गराउन गृह मन्त्रालय र प्रहरी प्रधान कार्यालयलाई सोमबार आदेश दिइएपछि उनलाई उपस्थित गराइएको हो ।
बयानको क्रममा प्रा डा केसीले अदालतमा सञ्चारमाध्यममा आफूले दिएका अभिव्यक्तिका आधारमा अदालतको अवहेलना भन्न नमिल्ने जिकिर गरेका छन् । उनले विज्ञप्ति मार्फत न्यायालयकाे अालाेचना नगरेको भनेका छन् । केसीले न्यायालयकाे अपमान गर्ने आफ्नो कुनै मनसाय नभएको तर अदालतको भ्रष्ट नेतृत्व र न्यायाधीश विरुद्ध आफ्नो लडाइँ भएको स्पस्ट पारेका छन् । प्रधानन्यायाधीश गाेपाल पराजुलीले भ्रष्टाचार बढाउने काम गरेको र त्यसकै बिरुद्द लडाइँ गरेको केसीले बताएका छन्।
केसीले अदालत मै प्रश्न गर्दै भनेका छन् ' भ्रष्टाचार विरुद्ध बोल्दा पक्राउ गर्ने कार्य किन गरियाे?'
आफ्नो मागमा अडिग भएको बताउदै केसीले अदालतकाे भ्रष्ट प्रवृत्ति विरुद्धको लडाईबाट पछि नहट्ने बयान दिएका छन् ।
बयान लिई सकेपछि उनको मुद्दा माथि सुनुवाई सुरु भएको छ । केसीको मुद्दा न्यायधिशहरु ओमप्रकाश मिश्र र केदार चालिसेको इजलासमा सुनुवाई हुने छ ।
केसीको पक्षमा ९२ वर्षीय वरिष्ठ अधिवक्ता कृष्णप्रसाद भण्डारीले पनि बहस गर्ने छन् । भण्डारीले लगायत केसीको पक्षमा ओमप्रकाश अर्याल, बाबुराम गिरी, दिनेश त्रिपाठी, सुरेन्द्र भण्डारीलगायत अधिबक्ताले बहस गर्नेछन्।
केसीको विपक्षमा रमण श्रेष्ठ, उपेन्द्रकेशरी न्यौपाने, श्याम खरेल, लक्ष्मण थपलिया र दीपक बिष्टले बहस गर्ने भएका छन्।
