नेकपा माओवादी केन्द्रबाट सरकारमा प्रतिनिधित्व गरिरहेका मन्त्रीले आज सरकार छाड्ने भएका छन् । विनाविभागीय मन्त्रीको हैसियतमा रहेका माओवादी मन्त्रीहरुले आज सामूहिक राजीनामा दिने भएका हुन् ।
नेता कृष्णबहादुर महरा राजधानी बाहिर रहेकाले गिरिराजमणि पोख्रेलको नेतृत्वमा राजीनामा बुझाउने तयारी गरेका छन् ।
गत जेठमा कांग्रेस सभापति शेरबहादुर देउवाको नेतृत्वमा निर्माण भएको सरकारमा नेता महराको नेतृत्वमा माओवादी मन्त्रीहरु सहभागी भएका थिए ।एमाले र माओवादीबीच चुनावी तालमेल भएपछि प्रधाननम्त्री शेरबहादुर देउवाले माओवादी मन्त्रीहरुको मन्त्रालय खोसिदिएका थिए।
निर्वाचनअघि राजीनामा दिने तयारी गरे पनि माओवादीले सरकार छाड्दा चुनाव नहुने निष्कर्ष निकालेको थियो। अब भने निर्वाचन सकिएको र राष्ट्रिय सभा निर्वाचनको तालिका पनि सार्बजनिक भईसकेकाले सरकार छोड्न लागेका हुन् ।
सरकारमा माओवादी केन्द्रका ८ मन्त्री र ८ राज्यमन्त्री बिनाविभागीय हैसियतमा रहेका छन ।
