पूवडीआईजी तथा ललितपुर क्षेत्र नं. १ का नवनिर्वाचित सांसद नवराज सिलवाललाई जहाँ भेट्यो त्यहि पक्राउ गरेर प्रहरी प्रधान कार्यालयमा बुझाउन नेपाल प्रहरीले ७७ वटै जिल्लामा सर्कुलर जारी गरेको छ । बुधवार प्रहरी प्रधान कार्यालयको अपराध अनुसन्धान विभागले सिलवाललाई पक्राउ गरी काठमाडौं प्रहरी परिसरमा उपस्थित गराउन ७७ वटै जिल्लामा सर्कुलर जारि गरेको हो ।
नेपाल प्रहरीले ३ वटा महानगरीय प्रहरी परिसर र ७४ जिल्लाका प्रहरी कार्यालयलाई प्रहरी मुख्यालयले यस्तो सर्कुलर जारी गरेको हो ।
पत्रमा मुख्यालयले मुलुकी ऐन किर्ते कागजको महलअन्तर्गतको सरकारी कागजात किर्ते मुद्दा अनुसन्धानको सिलसिलामा केही कुरा बुझ्नुपर्ने भएको हुँदा सिलवाललाई खोजतलास गरी उपस्थित गराइदिन भन्ने भाषा प्रयोग गरेको छ ।
यसअघि महानगरीय प्रहरी परिसर काठमाडौंले सिलवाललाई उपस्थित गराइदिन भन्दै महानगरीय प्रहरी परिसर ललितपुरलाई पत्र काटेको थियो । सिलवाललाई खोज्दै प्रहरी उनको घर पुगे पनि नभेटिएको जानकारी पठाइएको थियो ।