नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल प्रचण्डले एकताको संदेश दिन तय भएको कार्यकममा ब्यानरको बिषयलाई लिएर विवाद भएको छ । कार्यक्रम मध्यान्ह १२ बजे सभागृहमा हुने तय भएको थियो ।
कार्यक्रमको लागि 'नेपाल कम्युनिष्ट पार्टी स्थापना दिवस' लेखिएको ब्यानर राखिएको थियो । ब्यानरमा एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्ड सहित नेकपाका संस्थापक नेताहरू पुष्पलाल श्रेष्ठ, मदन भण्डारी र मनमोहन अधिकारीको फोटो थियो ।
माओबादी कार्यकर्ताहरुले ब्यानरमा मार्क्स र लेनिनको फोटो पनि हुनु पर्ने माग गर्दै मंच मै गएर हो हल्ला र नाराबाजी गरेका थिए । त्यस पछि अहिले ब्यानर हटाइएको छ । कार्यकर्ताहरुले ब्यानर बिना कार्यक्रम गर्न नदिने बताएका छन् । नयाँ ब्यानर राखेपछि मात्र कार्यक्रम सुरु हुने भएको छ ।
कार्यक्रमलाई ओली र दाहालले सम्वोधन गर्ने कार्यक्रम रहेको छ।
