ललितपुरमा प्रहरीले अपराधिक क्रियाकलापमा संलग्न अशोक लामामाथि गोली चलाएको छ ।
विभिन्न अपराधको आरोपमा पक्राउ पर्दै छुट्ने गरेका लामा पछिल्लो समय व्यापारीलाई धम्काउँदै हप्ता उठाउने गरेको उजुरी परेपछि उनलाई पक्राउ गर्न गोली चलाएको महानगरीय आयुक्त डिआईजी मनोज न्यौपानेले जानकारी दिए ।
लामालाई महानगरीय अपराध महाशाखाको टोलीले गोली प्रहार गरेको हो । गोली लामाको दाहिने खुट्टामा लागेको छ । उनको अहिले वीर अस्पतालमा उपचार भईरहेको छ ।
लामालाई पक्राउ गर्दा दुई राउन्ड गोली र एउटा पेस्तोल बरामद गरिएको अपराध महाशाखाका एसएसपी धीरजप्रताप सिंहले जानकारी दिए ।
लामासँगै रहेका उनका २ जना साथी भने भाग्न सफल भएको प्रहरीले जनाएको छ । प्रहरीमाथि आक्रमण गरेपछि प्रहरीले पनि जवाफी गोली चलाएको थियो । दाहोरो गोली हानाहान हुँदा लामाको खुट्टामा गोली लागेको प्रहरीले जनाएको छ ।