बंगलादेशमा डाक्टरी पढ्न जाने विद्यार्थीको बारेमा दिएको अभिव्यक्तिका आलोचित बनेका कानुन तथा संसदीय मामिला मन्त्री शेरबहादुर तामाङले राजिनामा घोषणा गरेका छन् । केही दिन अघि उनले एक कार्यक्रममा बंगलादेशमा डाक्टरी पढ्न जाने छात्राहरुले सर्टिफिकेटका लागि आफ्नो अस्मिता सुम्पनु पर्ने अभिव्यक्ति दिएका थिए । यसै कारण उनी विवादमा तानिएका थिए ।
उनले भनेका थिए 'बंगलादेशमा हाम्रा छोरी/चेलीहरु डाक्टर पढ्न जानुहुन्छ भने डाक्टरको सर्टिफिकेट लिनको लागि उसले कहीँ न कहीँ आफूलाई बेच्नैपर्छ। ...मैले सुनेको छु उनीहरुले त्यहाँ आफूलाई नसुम्पिकन सर्टिफिकेट प्राप्त गरिरहेको स्थिति छैन’।
आलोचना र विवाद बढेपछि आज पत्रकार सम्मेलन गर्दै उनले राजिनामाको घोषणा गरेका हुन् । उनले आफ्नो पदभन्दा ठुलो आफ्नो प्रतिष्ठा रहेको भन्दै नैतिकताको आधारमा प्रधानमन्त्री समक्ष राजिनामा बुझाएको जानकारी पत्रकार सम्मलेनमा दिएका हुन् ।
पत्रकार सम्मेलनमा भावुक बनेका उनले महिलाप्रति अाफ्नाे सधैं सम्मान रहेकाे बताए । छाेरीको अस्मिताका लागि अाफूले सधैं लडेकाे उनले स्मरण गराउदै उनले नारी अश्मिता, सम्मान र हक अधिकारको बिषयमा आफु संवेदनशील भएको बताए । बंगलादेशमा महिलामाथि हिंसा भएकाे सुनेर अाफूले त्यसबारे बोलेकाे उनले प्रष्ट पारे । आफूले नेपाली विद्यार्थीहरुले भोग्नु परेको समस्याहरुलाई उजागर गरेको भन्दै विवादास्पद अभिव्यक्तिको बचाउ गरे ।
पत्नी उषाकला राईसँगै उपस्थित भएका उनले जे विषयमा निरन्तर लागेको थियो त्यहि विषयले लखेटेको बताए । आफुले बोलेको कुराको टाउको र खुट्टा काटेर गलत ढंगबाट समाचार आएको भन्दै उनले दुखेसो पोखे ।
उनी भक्कानिएर आँसु पुछ्न थालेपछि केहीबेर सन्नाटा छाएको थियो । मन्त्री तामाङ केहीबेरमै सम्हालिएका थिए ।