प्रधानन्यायाधीशबारे निर्णय गर्न बसेको संसदीय सुनुवाई विशेष समितिको बैठक स्थगित भएको छ । प्रस्तावित प्रधानन्यायाधीश दीपकराज जोशीको संसदीय सुनुवाई सकिएपनि अन्तिम निर्णय गर्न भन्दै सोमबार बसेको बैठक पनि स्थगित भएको हो ।
संसदीय सुनुवाई समितिका जेष्ठ सदस्य लक्ष्मणलाल कर्णले प्रस्तावित प्रधानन्यायाधीशको बारेमा छलफल जारी रहेकाले निर्णय हुन नसकेको जानकारी दिए । समितीको बैठक शुक्रबार, आइतबार र सोमबार गरी ३ पटक स्थगित भइसकेको छ ।
कायम मुकायम प्रधानन्यायाधीश जोशीको शैक्षिक योग्यताका विषयमा प्रश्न उठेपछि जोशीलाई प्रधानन्यायाधीशमा सिफारिस गर्ने कि नगर्ने भन्नेमा सत्तारुढ नेपाल कम्युनिष्ट पार्टी (नेकपा)का सांसद नै अलमलमा परेका छन् ।
सुनुवाइ समितिका १५ मध्ये कम्तिमा १० जना सांसदको सहमति भएमा जोशीलाई प्रधानन्यायाधीशमा नियुक्तिका लागि राष्टपतिसमक्ष सिफारिस गर्न सकिन्छ । १५ सदस्यीय समितिमा नेकपाका ९ र संघीय समाजवादी फोरमका १ गरी सत्तारुढ दलका नै १० जना सांसद छन् । कांग्रेसका ४ र राजपाका १ जना सांसद संसदीय सुनुवाइ विशेष समितिमा सदस्य छन् ।
समितिको अर्को बैठक साउन १६ गतेका लागि बोलाइएको छ ।
