प्रधानन्यायाधीशबारे निर्णय गर्न बुधबार बसेको संसदीय सुनुवाई विशेष समितिको बैठक पुन: स्थगित भएको छ । प्रस्तावित प्रधानन्यायाधीश दीपकराज जोशीको संसदीय सुनुवाई सकिएपनि अन्तिम निर्णय गर्न भन्दै बुधबार बसेको बैठक पनि स्थगित भएको हो ।
समितीको बैठक शुक्रबार, आइतबार , सोमबार र बुधबार गरी ३ पटक स्थगित भइसकेको छ । अर्को बैठक शुक्रबारको लागि डाकिएको छ ।
कायम मुकायम प्रधानन्यायाधीश जोशीको शैक्षिक योग्यताका विषयमा प्रश्न उठेपछि जोशीलाई प्रधानन्यायाधीशमा सिफारिस गर्ने कि नगर्ने भन्नेमा सहमति जुट्न नसकेको हो । नेकपाका सांसदहरुले उनलाई अनुमोदन नगर्ने तयारी गरेका छन् ।
सुनुवाइ समितिका १५ मध्ये कम्तिमा १० जना सांसदको सहमति भएमा जोशीलाई प्रधानन्यायाधीशमा नियुक्तिका लागि राष्टपतिसमक्ष सिफारिस गर्न सकिन्छ । १५ सदस्यीय समितिमा नेकपाका ९ र संघीय समाजवादी फोरमका १ गरी सत्तारुढ दलका नै १० जना सांसद छन् । कांग्रेसका ४ र राजपाका १ जना सांसद संसदीय सुनुवाइ विशेष समितिमा सदस्य छन् ।
