भक्तपुरको दुई स्थानमा मंगलबार बिहान भेटिएको बम नेपाली सेनाले डिस्पोज गरेको छ । सूर्यविनायक र लोकन्थलीमा भेटिएको प्रेशर कुकर बम सेनाको टोलीले डिस्पोज गरेको हो ।
अरनिको राजमार्ग अन्तर्गत सूर्यविनायक नगरपालिका ६ आदर्श बस स्टप नजिकै र मध्यपुरथिमि नगरपालिका वडा नं. १ लोकन्थलीमा ६ लेन सडकको सर्भिस ट्रयाकको डिलमा झोलामा हालेर राखिएको बम भेटिएको थियो । दुबै बम सामान्य खालको भएको सेनाले जनाएको छ ।
त्यस्तै काठमाडौँको चन्द्रागिरी नगरपालिकाको सतुंगलमा मंगलबार बिहान शंकास्पद वस्तु भेटिएको छ । सतुंगलमा रहेको सिप्रदी ट्रेडिङमा शंकास्पद वस्तु भेटिएको हो । नेपाली सेनाको बम डिस्पोजल टोली अहिले शंकास्पद वस्तु भेटिएको स्थानमा पुगेको छ ।
त्यस्तै पूर्वपश्चि राजमार्गअन्तर्गत रौतहटको चन्द्रनिगाहपुर बजारमा पनि बम फेला परेको छ । राजमार्गसँगै रहेको चन्द्रपुर नगरपालिका–५ मुनलाइट फाउन्डेसनको पश्चिमपट्टी टिफिनको बट्टामा टेपले बेरी घडी र ब्याट्री समेत जोडिएको अवस्थामा बम फेला परेको प्रहरीले जनाएको छ । नेत्र बिक्रम चन्द विप्लब नेतृत्पको नेकपाले मंगलबार आह्वान गरेको नेपाल बन्दमा त्रास फैलाउने उदेश्यले बम राखिएको आशंका गरिएको छ ।
उता प्रहरीले अखिल क्रान्तिकारी विप्लव समूहकी केन्द्रीय सदस्य उषा किरण आजाद र काठमाडौं जिल्ला सचिव तारा सन्जेल रावललाई बम सहित पक्राउ गरेको छ ।