दशैँको लागी काठमाडौँ बाहिर जाने यात्रुहरुको लागी भोलीदेखी टिकट बुकिङ सहज हुने भएको छ । नेपाल यातायात व्यवसायी राष्ट्रिय महासंघले मंगलबारदेखि दशैँका लागि अग्रिम टिकट बुकिङ खुल्ला गर्ने निर्णय गरेपछि बुकिङ सहज हुने भएको हो ।
यसअघि कम्पनीमा दर्ता भएका गाडीहरुले बुकिङ थालिसकेका छन् । कम्पनीमा जान बाँकी अर्थात् समितिबाटै सञ्चालित गाडीहरुले भोलीदेखी बुकिङ लिने भएका हुन् । सरकारले पेट्रोलियम पदार्थको मूल्य बढाएको भन्दै व्यवसायीले विरोध गरेपछि असोज ५ गतेबाट खुल्ला गर्ने भनिएको बुकिङ हुन सकेको थिएन । तर सरकारले सार्वजनिक यातायातको भाडा १० प्रतिशतले बढाएपछि व्यवसायीहरु अग्रिम टिकट बुकिङ गर्न राजी भएका हुन् ।
महासंघको सोमबार बसेको कार्यसम्पादन सचिवालयको बैठकले हाल सञ्चालनमा रहेका गाडीबाटै यात्रुलाई ओसार्ने गरी अग्रिम टिकट बुकिङ खुल्ला गर्ने निर्णय गरेको महासचिव सरोज सिटौलाले जानकारी दिए ।
