नेपालको वैदेशिक व्यापार घाटा हालसम्म कै उच्च बिन्दुमा पुगेको छ । चालू आर्थिक वर्षको पहिलो तीन महिनामै साढे तीन खर्बको व्यापार घाटा बेहोरेको छ । आयात उच्चदरमा बढेपछि व्यापार घाटा अझ चुलिएको हो ।
भन्सार विभागका अनुसार असोज मसान्तसम्ममा नेपालमा कुल ३ खर्ब ७३ अर्ब ५८ करोड मूल्यका वस्तु आयात भएको छ । जुन अघिल्लो आर्थिक वर्षको सोही अवधिको तुलनामा ४३.५७ प्रतिशतले बढी हो । यसको युलानामा निर्यात भने १६ प्रतिशतले मात्रै बढेर ३४ अर्ब ९८ करोड रुपैयाँ पुगेको छ ।
निर्यातको तुलनामा आयात उच्च दरमा बढेपछि नेपालले तीन महिनामा ३ खर्ब ४९ अर्ब ८४ करोड रुपैयाँबराबरको व्यापार घाटा बेहोरेको हो । यो अघिल्लो आवको सोही अवधिको तुलनामा ४५.९२ प्रतिशतले बढी हो ।
यस अवधिमा नेपालले कुल १ सय ३७ वटा मुलुकसँग व्यापार गरेको छ । त्यसमध्ये १ सय ९ वटा मुलुकसँगको व्यापारमा नेपालले नोक्सान बेहोरेको छ । जम्मा २८ वटा मुलुकसँगको व्यापारमा मात्रै नेपालले नाफा आर्जन गरेको छ ।
