सरकारले धर्म प्रचार र अवैध व्यापार व्यवसायमा संलग्न १६३ विदेशी नागरिकलाई देश निकाला गरेको छ । अध्यागमन विभागका अनुसार गत ४ महिनाको अवधिमा पर्यटक भिसामा नेपाल आएर धर्म प्रचारदेखि अवैध व्यापारसम्ममा संलग्न १६३ लाई देश निकाला गरिएको हो ।
उनीहरूमध्ये अधिकांशले लुकिछिपी विभिन्न अवैध व्यापारसमेत गर्ने गरेको खुलेको छ । पर्यटक भिसामा आएकाले कुनै प्रकारको व्यापार व्यवसाय गर्न पाउँदैनन् । व्यापार व्यवसाय गर्न बिजनेस भिसा लिनुपर्ने प्रावधान छ ।
विभागले आर्थिक वर्ष २०७४÷७५ मा गलत काम गर्ने ६२२ जना विदेशीलाई निकाला गरेको थियो ।पर्यटक भिसामा नेपाल आएका विदेशीले धर्म प्रचार गर्न र अवैध व्यापार गर्न थालेपछि अध्यागमन विभागले पहिलोपटक ‘विदेशी नागरिक अनुगमन निर्देशिका २०७५’ बनाएर अनुगमनमा कडाइ गरेको हो ।