डडेलधुरामा भएको स्कुल बस दुर्घटनामा परी मृत्यु हुनेको संख्या १८ पुगेको छ । डडेल्धुराबाट डोटी जाँदै गरेको पिस जोन एकेडमीको से १ प २९३ नम्बरको बस बिहीबार साँझ दुई जिल्लाको सीमानामा पर्ने रडुवा नदीमा दुर्घटनामा परेको हो।
डडेलधुराका प्रहरी नायव उपरीक्षक डम्बर केसीका अनुसार १० जनाको घटना स्थल मै मृत्यु भएको हो । उपक्षेत्रीय अस्पताल डडेलधुरा पुर्याइएका अन्य ८ जनाको मृत्यु भएपछि मृतकको संख्या १८ पुगेको हो । दुर्घटनामा दुई दर्जन बढी घाइते भएका छन् । घाइतेमध्ये १५ जनाको अवस्था गम्भीर छ । उनीहरुलाई उपचारका लागि धनगढी लागिएको छ । वस सडक देखि ३ सय मिटर तल खसेको छ।
अमरगढी ५ मा लाग्ने उग्रतारा मेला हेरेर फर्केकाहरु दुर्घटनामा परेका प्रहरीले जनाएको छ । डडेल्धुराको उग्रतारा मन्दिरमा प्रत्येक वर्ष कार्तिक पूर्णिमाका दिन जात्रा लाग्ने गर्दछ । यस दिन सुदूरपश्चिमसहित नेपालका अन्य स्थान र भारतबाटसमेत दर्शनार्थी आउने गर्दछन। सार्वजनिक यातायातका साधनहरुमा बढी भीड हुने भएकाले डोटीबाट त्यहाँका स्थानीयहरुले एक नीजि स्कुलको गाडी लिएर जात्रा हेर्न आएका थिए । बसमा ४८ जना यात्रु सवार थिए।
मृतक मध्ये ६ जनाको सनाखत भएको छ ।
सनाखत भएका मृतकहरु
१) डोटीको नवदुर्गा गाउँपालिका-३ का २२ वर्षका चक्र धामी
२) दिपायल सिलगढी नगरपालिका-३५ वर्षका शशि विक
३) शिखर गाउँपालिका-११ का २५ वर्षका गोदा भाट
४) शिखर गाउँपालिका-११ का ४० वर्षका कैलाश रावल
५) शिखर गाउँपालिका-११ का ४० वर्षकै योगेन्द्र रावल
६) शिखर नगरपालिका-१० का १६ वर्षका रोहित बलायर