सरकारले २०७६ सालमा मुस्लिम समुदायको चाडहरु ईद, बकर ईद र मोहम्मद जयन्तिमा विदा दिन प्रस्ताव गरेको छ । मन्त्रिपरिषदले सार्वजनिक विदाका सम्बन्धमा अध्ययन गरी प्रतिवेदन पेश गर्न गृहमन्त्री, सहरी विकास मन्त्री र माननीय संस्कृति, पर्यटन तथा नागरिक उड्डयन मन्त्री सम्मिलित कार्यदल गठन गरेको थियो । सोहि कार्यदलले मुस्लिम समुदायले मान्ने ३ वटा चाडमा पनि विदा थप्न सरकारलाई सिफारिस गरेको हो ।
२०७५ सालमा घोषणा भएका सार्वजनिक विदाहरु यथावत राख्दै कार्यदलले थप पर्वमा विदा दिन प्रस्ताव गरेको हो ।
यस संगै मुस्लिम समुदायले आफ्ना ३ मुख्य पर्व इदुल फित्र,बकरइद र मोहम्मद जयन्तीमा विदा पाउने भएका हुन् । विदा कटौती गरिएकोमा अशन्तुष्ट जनाउदै मुस्लिम समुदायहरुले विदा थप्न माग गर्दै आएका थिए ।
यी प्रस्ताव मन्त्रिपरिषदले पारित गरेपछि कार्यन्वयनमा आउने छ ।
यस बाहेक किरात समुदायको चाड उभौलि र उधौलीमा, त्यस्तै क्रिसमस, तमु ल्होसार, सोनाम ल्होसार, ग्याल्वो ल्होसार र छठ पर्वमा पनि विदा प्रस्ताव गरिएको छ । ऋषि पञ्चमीमा महिलाहरुलाई मात्र सार्वजनिक विदा दिने कार्यदलले प्रस्ताव गरेको छ । यस्तै माघी पर्व र जनैपूर्णिमामा पनि सार्वजनिक विदा दिने प्रस्ताव कार्यदलको छ ।
