संसदको शिक्षा तथा स्वास्थ्य समितिले बहुमतले राष्ट्रिय चिकित्सा शिक्षा विधेयक पारित गरेको छ । समितिको बुधबार बसेको बैठकले विधयेक पारित गरेको हो । बैठकमा उपस्थित १८ सांसद मध्ये १४ सांसदले विधयेकको पक्षमा र ४ सांसदले विपक्षमा मतदान गरेका थिए । गगन थापा सहित बिपक्षी दलका सांसदले विपक्षमा मतदान गरेका हुन् । विधेयकमा भएको विवादित विषयमा छलफल गरेर आवश्यक सुझाव दिन गठित उपसमितिले आइतबार बुझाएको प्रतिवेदन समितिले हुबहु पारित गरेको हो ।
डा. गोविन्द केसीको माग समाबेश नगरी समितिले विधयेक पारित गरेको हो । केसीको १५ औ अनसनको क्रममा भएको सहमति बिपरित बिधेयक पारित भएको हो। आफू र सरकारबीच भएको सम्झौता पूर्ण पालना नभए पुन अनसन बस्ने चेतावनी केसीले दिइसकेका छन्। उनी अनसनको लागि इलाम पुगीसकेका छन् ।
गत साउन १० मा डा.केसीका प्रतिनिधि र सरकारबीच चिकित्सा शिक्षा विधेयक संशोधनमा सहमति भएको थियो। आगामी १० वर्षभित्र काठमाडौं उपत्यकाभित्र नयाँ मेडिकल कलेजलाई सम्बन्धन नदिने, एउटा विश्वविद्यालयले ५ भन्दा बढी मेडिकल कलेजलाई सम्बन्धन नदिने, सम्बन्धन पर्खिरहेका काठमाडौंका मेडिकल कजेल सरकारले किनिदिएर काठमाडौंबाहिर जान सहजीकरण गर्नेलगायतका २२ बुँदामा त्यतिबेला सहमति भएको थियो। बिधेयकमा उनका माग समावेश भएका छैनन् ।
