खानेपानी मन्त्री विना मगरले विभागीय सचिव गजेन्द्र ठाकुरलाई हटाएकी छिन् । मेलम्ची खानेपानी प्रकरणमा मन्त्री र सचिवबीचको विमती लम्बिएपछि मन्त्री मगरले सचिवलाई हटाएकी हुन् ।
ठाकुरले आफूलाई मन्त्रालयबाट हटाइएको भन्दै मेलम्चीको विषयमा मन्त्री मगरसँग कुरा नमिलेको स्वीकार गरेका छन् । मेलम्ची खानेपानी आयोजनाका ठेकेदार कम्पनी सिएमसी डी रेभेन्नाले छाडेपछि बहुप्रतिक्षित आयोजना अलपत्र छ । सचिव ठाकुरमाथी सिएमसी हटाउन प्रमुख भूमिका खेलेको आरोप लागेको छ ।
सिएमसीले काम छाडेर गएपछि मन्त्री मगरकै अग्रसरतामा आफ्नो स्वकीय सचिवसहितको टोली वार्ताका लागि सिंगापुर पठाएकी थिइन् । तर सचिव ठाकुर भने सिएमसीलाई नफर्काउने र नयाँ टेण्डर गरेर मेलम्ची अघि बढाउने पक्षमा थिए ।