शिवम सिमेन्टको प्रमुख कार्यकारी अधिकृतमा सजन देवकोटा नियुक्त भएका छन् । कम्पनीको सञ्चालक समितिको ५१ औं बैठकले चैत्र १ गतेदेखि लागु हुने गरी देवकोटालाई उक्त पदमा नियुक्त गरेको हो।
विभिन्न नेपाली उद्योग तथा बहुराष्ट्रिय कम्पनीहरुमा काम गरेका देवकोटा बिगत ४ बर्षदेखि शिवममा थिए । देवकोटासँग २२ वर्षको व्यवस्थापकीय कार्य अनुभव रहेको छ । उनी बिगतमा नेस्टले ईण्डिया लिमिटेड, नेपाल लिभर लिमिटेड, वरुण विभरेज नेपाल, नेविको विस्कुट, चौधरी ग्रुप नेपाल लगायतमा आवद्द थिए ।
देवकोटाको लामो व्यवस्थापकीय कार्य अनुभव, कार्य कुशलता तथा टिमवर्क प्रतिको विश्वासनीयताको उपयोगबाट कम्पनीले लिएका समग्र लक्ष्यहरु सहजै हासिल होस भन्ने अपेक्षा रहेको कम्पनीले जनाएको छ ।
शिवम् सिमेन्ट लिमिटेड सन् २००९ देखि नेपालको केन्द्र भाग हेटौँडामा स्थापित भई जर्मन प्रविधीयुक्त प्लान्टबाट आफ्नै चुनढुङ्गाको प्रयोग गरी क्लिंकर र शिवम् सिमेन्ट तथा शिवमप्लस सिमेन्ट उत्पादन गरिरहेको छ। शिवम् सिमेन्टस् हालै सर्वसाधारणमा प्रिमियम मूल्यमा शेयर जारी गर्ने निजी क्षेत्रको पहिलो पब्लिक लिमिटेड कम्पनी बनेको छ।