अख्तियार दुरुपयोग अनुसन्धान आयोगका तत्कालीन आयुक्त राजनारायण पाठकविरुद्ध विशेष अदालतमा आज भ्रष्टाचार गरेको आरोपमा मुद्दा दायर भएको छ ।
पदको दुरुपयोग गरी नेपाल इञ्जिनीयरिङ कलेजको विवाद मिलाउने भनी ७८ लाख घुस लिएको अभियोगमा मुद्दा दायर गरिएको आयोगका प्रवक्ता प्रदीपकुमार कोइरालाले जानकारी दिए । अख्तियारले न्यौपानेले पाठकलाई ७८ लाख रुपैयाँ घुस दिएको कुरा आयोगलाई प्राप्त श्रव्य दृश्य सामग्रीहरुबाट समेत पुष्टि भएको बताएको छ । पाठकले घुस लिएको सार्वजनिक भएपछि फागुन ३ गते राजीनामा दिएका थिए।
पाठकलाई घुस दिएका कलेजका संचालक लम्बोदर न्यौपानेलाई अख्तियारले ८ वर्ष कैद सजाय मागदाबी गरेको छ । उनलाई पनि भ्रष्टाचार निवारण ऐन अनुसार कैद सजाय र जरिवाना माग विशेष अदालतमा मुद्दा दायर भएको छ ।