नेकपाका सचिवालय सदस्य बामदेव गौतमले मिडिया काउन्सिलसम्बन्धी विधेयक सच्याउनु पर्ने बताएका छन । राष्ट्रियसभा सचिवालयमा दर्ता भएको उक्त विधेयकका केही प्रावधान नेपालको संविधानको अक्षर र भावनाअनुरुप नभएको उनले बताएका हुन।
बिधेयकका विवादास्पद प्रावधानहरु सञ्चार क्षेत्रका जिम्मेवार एवं सरोकारवालासंग छलफल गरि टुंगो लगाउन र अहिलेकै अवस्थामा विधयेक अघि नबढाउन उनले सरकार समक्ष आग्रह गरेका छन्। उनले भनेका छन् ' सरकार, राजनीतिक पार्टी र प्रेस सबै मर्यादित र अनुशासित हुनुपर्दछ भन्ने विचारसँग म पूर्ण सहमत छु । तर, समाचार लेखेकै आधारमा पत्रकारलाई दश–दश लाख रुपैयाँसम्म जरिवाना गर्नेजस्ता कठोर प्रावधान उचित लाग्दैन ।'
प्रेस, व्यवसायिक पत्रकार र सञ्चारकर्मीहरुलाई स्वतन्त्र, निष्पक्ष, निर्भिक एवं सुरक्षित वातावरणमा काम गर्ने अवस्था राज्यले निर्माण गर्नु पर्ने पनि उनले बताए।
साथै उनले कुनै पनि व्यक्तिको चरित्र हत्या हुने, बदलाको भावनाले परिचालित हुने र राष्ट्रिय हितलाई वेवास्ता गर्ने क्रियाकलाप सञ्चार क्षेत्रमा प्रकट हुन नदिन सबै सञ्चारकर्मीहरुलाई पनि आग्रह गरेका छन ।