पर्सामा अपहरणमा परेका ८ बर्षीय बालकको हत्या भएको छ । गत शुक्रबार अपहरणमा परेका वीरगञ्ज महानगरपालिका–३ प्रगति नगरका करण साहको अपहरणपछि हत्या भएको हो । उनी गत शुक्रबार बिहान साढे १० बजेतिर अपहरणमा परेका थिए । बालकको शव कलैया उपमहानगरपालिका–२५ को खौरहीस्थित खोलामा फेला परेको छ ।
प्रहरीले अपहरण र हत्यामा संलग्न तीन जनालाई गोली हानेर नियन्त्रणमा लिएको छ । प्रहरीले विकास शर्मा, सिकिन्द्र साह र राम विनेशलाई गोली हानी नियन्त्रणमा लिएको हो । अपहरणकारीको कम्मरमुनि गोली लागेको छ । रामविनेशलाई भने गोलि नलागेको प्रहरीले जनाएको छ । पक्राउ परेका विकास शर्मा भारतीय नागरिक हुन् । उनीहरु भाग्न खोजेपछि गोली हानेर प्रहरीले नियन्त्रणमा लिएको हो ।
उनीहरुले परिवारसँग सुरुमा ३० लाख फिरौती रकम मागेका थिए । पाँच लाख दिने सहमति भएको भएपनि उनीहरुले शुक्रबार राति नै बालकको हत्या गरेको प्रारम्भीक अनुसन्धाबाट खुलेको छ । अपहरणकारीहरुले बालक हत्या गर्नु अगाडि नै बच्चाको बोली रेकर्ड गरेर हत्या गरेको र त्यसपछि अडियो सुनाएर फिरौती मागेको प्रारम्भीक अनुसन्धानबाट खुलेको छ ।
