सत्तारुढ नेपाल कम्युनिष्ट पार्टीका अध्यक्ष पुष्पकमल दाहाल प्रचण्डले सत्ताको नेतृत्व फेरिने संकेत गरेका छन् । एक टेलिभिजन कार्यक्रममा अन्तर्वाता दिँदै प्रचण्डले पार्टीक एकताका समयमै अध्यक्ष एवम् प्रधानमन्त्री केपी शर्मा ओली र आफूबीच सत्ताको नेतृत्व आलोपालो प्रणालीबाट सञ्चालन गर्ने सहमति भएको खुलासा गरेका हुन् ।
तत्कालीन नेकपा एमाले र माओवादी केन्द्रबीच २०७५ जेठ ३ गते ६ बुँदे संयुक्त घोषणा भएको थियो । जेठ २ गते नै दुई पार्टीबीच गोप्य पाँचबुँदे सहमति भएको थियो ।
गत सोमबार पार्टी कार्यक्रमको सिलसिलामा विराटनगर पुगेका प्रचण्डले “पार्टी एकताका बेला एउटा समझदारी गरेका थियौँ, त्यो सबैलाई थाहा छ, मेरो मुखबाट नबोलाउनूहोस्” भनेका थिए । टेलिभिजन अन्तर्वातामा प्रचण्डले ओली र आफूले साढे दुई–साढे दुई वर्ष सरकार सञ्चालन गर्ने सहमति गरेको बताएका छन् ।