सरकारले विराटनगरस्थित कोइराला निवासबाट सुरक्षाकर्मी फिर्ता बोलाएको छ । नेपाली कांग्रेसका पूर्वसभापति र पूर्वप्रधानमन्त्रीसमेत रहेका दुई कोईराला नेता विश्वेश्वरप्रसाद कोइराला र उनका भाइ गिरिजाप्रसाद कोइरालाको विराटनगरस्थित निवासबाट सरकारले सुरक्षाकर्मी फिर्ता गरेको हो ।
कोइराला निवासमा २०५४ सालदेखि राखिएका सुरक्षाकर्मी सरकारले गत बिहिबार फिर्ता गरेको हो । सशस्त्र प्रहरी बलका असइको नेतृत्वमा १३ जनाको टोलीले कोइराला निवासको सुरक्षा दिँदै आएका थिए । कोइराला निवासको जग्गा जमिन बीपीपुत्र शशांक कोइराला, गिरिजाकी छोरी सुजाता कोइराला र शेखरको नाममा छ ।
सशस्त्र प्रहरीका प्रवक्ता सुरजकुमार श्रेष्ठले गृहमन्त्रालयबाट पत्र प्राप्त भएपछि सुरक्षाकर्मीलाई फिर्ता बोलाएको जानकारी दिएका छन् ।
