बुधबार राति भारी बर्षाको सम्भावना, सतर्क रहन आग्रह

बिजपाटी संवाददाता

बिजपाटी संवाददाता

Jul 24, 2019 | 08:46:12 PM मा प्रकाशित

laxmi  sunrise bank

मौसमविद्ले आज राति विभिन्न स्थानमा पानी पर्ने भएकाले बाढी र पहिरो आउनसक्ने भन्दै सतर्क हुनुपर्ने बताएका छन् । जल तथा मौसम विज्ञान विभाग, मौसम पुर्वानुमान महाशाखाका अनुसार अबको केही घण्टा ठूलो पानी पर्ने अवस्था नरहे पनि राति १२ बजेपछि देशका धेरै स्थानमा पानी पर्ने भएकाले सतर्क हुनुपर्नेछ ।

महाशाखाका मौसमविद् मिनकुमार अर्यालले सुदूरपश्चिमको पहाडी र हिमाली क्षेत्रबाहेकका ठाउँमा मौसम बदली भएको जानकारी दिए । “अहिले बादलको विकास भएको छैन, फाटेको छ, भीषण वर्षा हुने अवस्था तत्काल देखिँदैन, केही स्थानमा मेघगर्जनको बादल छ, राती १२ बजेपछि बिहान १० बजेसम्म धेरै ठाउँमा पानी पर्छ”, अर्यालले राससलाई जानकारी दिए ।

उनका अनुसार रातिको समयमा देशका पूर्व र मध्यका थोरै स्थान र पश्चिमका एक÷दुई स्थानमा भारी वर्षाको सम्भावना छ । “ती क्षेत्रका पहाडी भूभागमा पहिरो जान सक्ने तथा पहाड तथा चुरेबाट बहने खोलामा जल सतह बढ्न सक्ने भएकाले सतर्कता अपनाउन अनुरोध गरिन्छ साथै हवाई तथा सडक यातायातमा समेत प्रभाव पर्नसक्ने भएकाले सतर्कता अपनाउनु अनुरोध गरिन्छ”, विभागले जारी गरेको सूचनामा भनिएको छ ।

मौसमविद् अर्यालले अहिले देशैभरि नै मौसममा बदली रहेको जानकारी दिए । महाशाखाका अनुसार हाल मनसुनको न्यूनचापीय रेखा नेपालको तराई भूभाग नजिकै छ । जसका कारणले अहिले नेपालमा मनसुनी वर्षा सक्रिय हुने देखिन्छ । अबको २४ घण्टामा मनसुनको न्यूनचापीय रेखा अझ दक्षिणतिर सर्ने र मनसुनी गतिविधि कम सक्रिय हुनेछ ।

बिहीबार दिउँसो देशभर सामान्य बदली रही देशका केही स्थानमा वर्षा हुनेछ भने पश्चिम तथा पूर्वका एक वा दुई स्थानमा भारी वर्षाको सम्भावना रहेको महाशाखाले जनाएको छ । राति भने देशभर सामान्य बदली रही केही स्थानमा वर्षा हुनेछ । शुक्रबार दिउँसो देशभर सामान्य बदली रही केही स्थानमा वर्षा हुनेछ । देशको पश्चिम भेगका एक वा दुई स्थानमा भारीको सम्भावना रहेको जनाइएको छ ।

Share Your Thoughts

Recent News

Main News

TRENDING

Close in 7


Bizpati.com © 2020. All Rights Reserved