नेपालमा उत्पादन हुने फलफूल तथा तरकारीमा पहिलोपटक जिवनाशक विषादीको सीमा तोकिएको छ । खाद्य प्रविधि तथा गुण नियन्त्रण विभागले दश प्रकारका फलफूल तथा तरकारीमा एमआरएल (म्याक्सिमम रेजिड्यू लिमिट) तोकिएको हो ।
विभागका वरिष्ठ खाद्य अनुसन्धान अधिकृत मोहनकृष्ण महर्जनले फलफूलमा स्याउ र केरा तरकारीमा करेला, भन्टा, काउली, बन्दा, भिन्डी, आलु, गोलभेँडा र चियामा जीवनाशक विषादीको अधिकतम प्रयोग सीमा तोकिएको जानकारी दिए ।
राजपत्रमा प्रकाशनका लागि पठाइएको सूचनामा स्याउमा २७ प्रकारका विषादीको अधिकतम प्रयोग सीमा तोकिएको छ । केरामा ४२, करेलामा १, भण्टामा २१, बन्दामा ३६, काउलीमा १३, भिण्डीमा ३, आलुमा ७१, टमाटरमा ७३ तथा चियामा १९ प्रकारका विषादीको अधिकतम प्रयोग सीमा तोकिएको छ ।
विभागका अनुसार यसअघि पिउने पानी, पाउडर दुध र गेडागुडी जस्ता खाद्य वस्तुमा मात्रै एमआरएल तोकिएको थियो । यो नयाँ नियम भने भदौ १५ बाट लागू हुने भएको छ ।