जिल्ला प्रशासन कार्यालय चितवनले भरतपुरमा निषेधित क्षेत्र घोषणा गरेको छ । पत्रकार शालिकराम पुडासैनीको आत्महत्या प्रकरणमा सञ्चारकर्मी रबी लामिछाने पक्राउ परेपछि उनको समर्थनमा जारी प्रदर्शन चर्किएपछि प्रशासनले निषेधित क्षेत्र तय गरेको हो । प्रशासनले भरतपुरको चौबीसकोठीदेखि मालपोतचोकसम्म निषेधित क्षेत्र घोषणा गरेको हो ।
चितवनका प्रहरी प्रमुख (एसपी) दान बहादुर मल्लले प्रदर्शनले प्रशासनिक कामकाज प्रभावित भएपछि सुरक्षा व्यवस्था कडा पारिएको जानकारी दिए । प्रहरीले अनुसन्धानका लागि लामिछानेसहित ३ जनालाई पक्राउ गरेपछि रबीका समर्थकले ४ दिनदेखि लगातार प्रदर्शन गर्दै आएका छन् ।