चितवनको भरतपुरमा प्रहरी र सञ्चारकर्मी रबी लामिछानेका समर्थकहरुबीच झडप भएको छ । जिल्ला अदालत चितवनमा लामिछानेको थुनछेक बहस चलिरहेको बेला उनका समर्थकहरुले सार्वजनिक सवारी साधनमा तोडफोड गरेका थिए । त्यसपछि झडप भएको हो ।
प्रहरीले दुई राउण्ड अश्रु ग्यास प्रहार गरेको छ । निषेधित क्षेत्रमा बाहिरै रोकेर राखिएका ट्रक र मोटरसाइकलमा रबीका समर्थकले तोडफोड गरेपछि झडप भएको हो ।प्रहरीले रबीका केही समर्थकलाई नियन्त्रणमा समेत लिएको छ ।
पत्रकार शालिकराम पुडासैनीको आत्महत्या प्रकरणमा पक्राउ परेको रबीको पक्षमा चितवनमा प्रदर्शन जारी छ । उनीहरुको प्रदर्शनलाई लक्षित गरी चितवन प्रशासनले निषेधाज्ञासमेत जारी गरेको छ ।
स्थानीय प्रशासन ऐन २०२८ को दफा ६ को ३ क अनुसार प्रमुख जिल्ला अधिकारीले निषेधाज्ञा तोक्न पाउने व्यवस्था छ । यसरी तोकिएको निषेधाज्ञा उल्लंघन गर्नेलाई प्रजिअ स्वयम्ले ५०० सम्म जरिवाना वा एक महिनासम्म कैद अथववा दुवै सजाय तोक्न सक्ने प्रावधान छ ।
