चिनियाँ राष्ट्रपति सी जिनपिङ आज एयर चाइनाको प्रेसिडेन्टल जेट विमान बोइङ ७४७–४०० मार्फत नेपालको त्रिभुवन अन्तराष्ट्रिय विमानस्थलमा ओर्लदै छन् । उनी अपरान्ह ४ः३० देखि ५ः३० बजेको अवधिमा नेपाल ओर्लने कार्यक्रम छ ।
राष्ट्रपति विद्यादेवी भण्डारीको निमन्त्रणामा राष्ट्रपति सी शनिबार भारतको चेन्नई अन्तराष्ट्रिय विमानस्थलबाट सोझै काठमाडौँ आउनेछन् ।
सुरक्षा प्रवन्ध यस्तो छ
राष्ट्रपति सीको नेपाल भ्रमण अवधिमा सुरक्षाका लागि ४ वटै सुरक्षा निकाय परिचालन गरिने छन् । सीको सुरक्षाको लागि नेपाली सेना, नेपाल प्रहरी, सशस्त्र प्रहरी बल र राष्ट्रिय अनुुसन्धान विभागका कर्मचारी खटिएका छन् ।
गृह मन्त्रालयका अनुसार पहिलो घेरामा नेपाली सेना रहनेछ । दोस्रो घेरामा प्रहरी र तेस्रो घेरामा सशस्त्र प्रहरीको सुरक्षा घेरा रहने छ । नेपाली सेनाका प्रवक्ता एवम् सहायकरथी विज्ञानदेव पाण्डेले सुरक्षाको पहिलो घेरामा नेपाली सेनाको लिड रहने पुष्टि गरे ।
दोस्रो घेरामा रहने नेपाल प्रहरी रहने छ । सीको सुरक्षाका लागि १६ हजार प्रहरी परिचालित हुनेछन् । तेस्रो घेरामा सशस्त्र प्रहरी बल रहनेछ । पुल, आकाशेपुल र कल्भर्टमा सशस्त्र प्रहरी बलका सुरक्षा अधिकारीहरु परिचालित छन् । करिब ७ हजार सशस्त्र प्रहरी परिचालन गरिएको छ ।
नेपाल प्रहरी र सशस्त्र प्रहरी बलका मात्रै २३ हजार अधिकारी सीको सुरक्षाका लागि खटिने छन् । नेपाली सेनाले भने आवश्यकता अनुसार सैन्य अधिकारीहरु सुरक्षाका लागि परिचालन गरिने जनाएको छ ।
