प्रधानमन्त्री पुष्पकमल दाहाल प्रचण्डले आज दिउँसो व्यवस्थापिका संसदलाई विशेष सम्बोधन गर्ने भएका छन् । प्रधानमन्त्रीले १ बजे सम्बोधन गर्ने कार्यक्रम संसद सचिवालयले जनाएको छ । उनले संसदमा सम्बोधन गर्दै राजीनामाको घोषणा पनि गर्ने भएका हुन् ।
सरकार गठनको बेला भएको समझदारी अनुसार नै उनले नेपाली कांग्रेसका सभापरी शेर बहादुर देउवालाई सत्ता हस्तान्तरण गर्न लागेका हुन् । काँग्रेस र मधेसी मोर्चासहित केही साना दलको समर्थनमा उनी गत १९ साउनमा दोश्रोपटक मुलुकको कार्यकारी प्रधानमन्त्री भएका थिए ।
बालुवाटार स्रोतका अनुसार प्रधानमन्त्रीले गर्ने भाषण तयार भईसकेको छ । उनले संसदमा लिखित र केही अखिलित भाषण गर्नेछन् । भाषण अनुमोदन गराउन र आवश्यक परिमार्जन गर्न प्रधानमन्त्रीले मन्त्रिपरिषद बैठक आह्वान गरेका छन् ।
सम्बोधनमा आफ्नो नेतृत्वको सरकारले हालसम्म गरेका कामहरुको फेहरिस्त समेटिने बताईएको छ ।