आईसीसी विश्व क्रिकेट लिग च्याम्पियनसिप अन्तर्गत भोली बुधबार नेपालले युएईसँग उसकै घरेलु मैदानमा प्रतिस्पर्धा गर्दै छ । आईसीसीले उक्त खेलको आफ्नो वेबसाइट मार्फत प्रत्यक्ष प्रसारण गर्ने जनाएको छ । नेपाल र युएईबीचको खेल शिख जायद क्रिकेट रंगशालामा नेपाली समय अनुसार बिहान ११ बजेर १५ मिनेटमा सुरु हुनेछ।
खेलको लागि नेपाल एकहप्ता अघि नै यूएई प्रस्थान गरिसकेको छ। त्यहाँ रहंदा नेपालले अमेरिका र केन्यासँग अभ्यास खेल खेलेको थियो ।जसमा नेपाल अमेरिकासँग पराजित भएको थियो भने केन्या विरुद्ध जित निकालेको थियो। दुबै खेलमा कप्तान पारस खड्का, उपकप्तान ज्ञानेन्द्र मल्ल, विनोद भण्डारी र करण केसीले खेलेका थिएनन्।
च्याम्पियनसिपको शीर्ष चारमा रहने टोली विश्वकप छनोट खेल्ने प्राबधान रहेकोमा च्याम्पियनसिपको छैटौं चरण अन्तर्गत गएको कात्तिकमा हङकङविरुद्ध एक खेलमा हार र एक खेलमा अंक बाडेपछि नेपाल शिर्ष ४ मा नपर्ने निश्चित भएको छ । उक्त हार संगै नेपाल भिजन दुईमा झरेको छ ।
नेपालले विश्वकप छनोट खेल्न आगामी फ्रेब्रअरीमा हुने डिभिजन टु खेल्नुपर्नेछ। डिभिजन २ सन् २०१८ को फेब्रुअरीमा नामिबियामा हुनेछ । नेपालले डिभिजन २ बाट विश्वकप छनोटमा पुग्ने अन्तिम मौका पाउने छ । डिभिजन २ को शीर्ष दुई टोलीले विश्वकप छनोट खेल्न पाउने प्रावधान रहेको छ ।
यस्तो छ नेपाली टोली : पारस खड्का (कप्तान), ज्ञानेन्द्र मल्ल, शरद भेषावकर, वसन्त रेग्मी, सोमपाल कामी, सागर पुन, विनोद भण्डारी, करण केसी, ललितसिंह भण्डारी, मोहम्मद आरिफ शेख, दीपेन्द्रसिंह ऐरी, सन्दीप लामिछाने, दिलीप नाथ र शक्ति गौचन।
