आईसीसी विश्व क्रिकेट लिग च्याम्पियनसिप अन्तर्गत अन्तिम तथा सातौँ चरणको पहिलो खेलमा नेपालले पराजय भोगेको छ। घरेलु टोलि युनाइटेड अरब इमिरेटसको शिख जायद क्रिकेट रंगशालामा भएको खेलमा नेपाल युएईसंग ७ विकेटले पराजित भएको हो।
नेपालले दिएको २२२ रनको लक्ष्य युएईले निर्धारित ओभर सकिन ४ ओभर १ बल बाँकी छँदा मात्र ३ विकेटको क्षतिमा पुरा गर्यो। युएईका लागि गुलाम सबिरले नटआउट ८१ रनको पारि खेले। सबिरले ८ चौकाको मद्दतमा ८१ रन जोडेसंगै नेपालको हार्ने सम्भावना बढेको थियो।
त्यस्तै युएईका लागि कप्तान रोहन मुस्ताफाले ६२ रन बनाए । उनले ७१ बलको सामना गर्दै ७ चौका र एक छक्का प्रहार गरे। त्यस्तै, युएईका लागि रमिज शाहजादले ३७ रन बनाए। नेपालका लागि सन्दिप लामिछाने र शरद भेषवाकरले समान १–१ विकेट लिए।
टस हारेर पहिले ब्याटिङको निम्तो पाएको नेपालले निर्धारित ५० ओभरको खेलमा पुरै ओभर खेल्दै ६ विकेटको क्षतिमा २२१ रन जोड्यो। नेपालका लागि शरद भेषवाकर र उपकप्तान ज्ञानेन्द्र मल्लले अर्धशतक बनाए । शरदले अविजित रहँदै ८१ रन बनाए । उनले ९५ बलको सामना गर्दै पाँच चौका प्रहार गरे । त्यस्तै बसन्त रेग्मी १४ रनमा अविजित रहे ।
त्यस्तै नेपालको लागि उपकप्तान ज्ञानेन्द्र मल्लले ८३ बलमा ६ चौकासहित ५४ रन बनाए । तर नेपालका कप्तान पारस खड्का र सोमपाल कामीले समान २०–२० रन मात्र जोडे भने ओपनर दिलिप नाथले मात्र १६ रन बनाएर पेभेलियन फर्किए। साथै विनोद भण्डारी ४ तथा आरिफ शेख शून्य रनमा आउट भए । युएईका लागि जाहुर खानले दुई र अहमेद राजा, मोहमद नाभिद र रोहन मुस्ताफाले समान एक एक विकेट लिए ।
बलियो टिम युएई सामु नेपालको बलिंग र ब्याटिङ कम्जोर बन्दा सातौं चरणको पहिलो खेलमा नेपालले पराजय भोगेको हो। गत कात्तिकमा हङकङविरुद्ध एक खेलमा हार र एक खेलमा अंक बाडेपछि नेपाल शिर्ष ४ मा नपर्ने निश्चित भएको छ । उक्त हार संगै नेपाल डिभिजन दुईमा झरेको छ ।
नेपालले विश्वकप छनोट खेल्न आगामी फ्रेब्रअरीमा हुने डिभिजन टु खेल्नुपर्नेछ। डिभिजन २ सन् २०१८ को फेब्रुअरीमा नामिबियामा हुनेछ । नेपालले डिभिजन २ बाट विश्वकप छनोटमा पुग्ने अन्तिम मौका पाउने छ। डिभिजन २ को शीर्ष दुई टोलीले विश्वकप छनोट खेल्न पाउने प्रावधान रहेको छ नेपालले घरेलु टोलीविरुद्ध शुक्रबार दोस्रो खेल खेल्नेछ ।
