टिभीएस एभरेष्ट प्रिमियर लिग टि २० क्रिकेट प्रतियोगितामा ललितपुर प्याट्रिएट्सले बिजयी सुरुवात गरेको छ । आज भएको उद्घाटन खेलमा ललितपुरले काठमाडौँ किंग्स इलाभेनलाई ७ विकेटले पराजित गर्दै प्रतियोगितामा उत्कृष्ट सुरुवात गरेको हो ।
टस हारेर पहिले ब्याटिंग गरेको काठमाडौँ किंग्स ईलाभेनले १८.३ ओभर अल आउट हुदै ८९ रन मात्र जोड्न सक्यो। काठमाडौँको लागि अमित श्रेष्ठले सर्बाधिक २७ रन जोडे भने फर्नान्डोले १५ र सोमपाल कामीले १४ रन जोड्नु बाहेक अन्यले दोहोरो अंकको स्कोर बनाउन सकेनन ।
काठमाडौँलाई सस्तोमा समेट्नको लागि ललितपुरका बिदेशी खेलाडी सुबोध भाटीले ४ तथा ललित राजबंशीले ३ विकेट लिए ।
९० रनको झिनो लक्ष्य पछ्याउँदै ब्याटिङ गरेको ललितपुरले १६.४ ओभरमा ३ विकेटको क्षतिमा लक्ष्य पूरा गर्यो । ललितपुरका लागि ओपनर जयकिसन कोल्सवालाले उत्कृष्ट प्रदर्शन गर्दै नटआउट ४४ रन बनाए भने कप्तान ज्ञानेन्द्र मल्लले २० रन बनाए । त्यस्तै, राजविर सिंह १४ रनमा अविजित रहे ।
प्रतियोगिताको दोस्रो दिन मंगलबार २ खेल हुँदैछन् । पहिलो खेलमा चितवन टाइगर्सले पोखरा राइनोजसँग विहान ९ बजेदेखि प्रतिस्पर्धा गर्दैछ । त्यस्तै, दोस्रो खेलमा विराटनगर वारिवर्सले ललितपुर प्याट्रिएट्ससँग खेल्दैछ ।
इपिएल क्रिकेट राउन्ड रोविन लिगका आधारमा हुनेछ । शीर्ष चार टोली प्लेअफमा पुग्ने छन् । पहिलो प्लेअफमा विजेता हुने टिम फाइनल प्रवेश गर्नेछ । पराजित हुनेले फाइनल प्रवेशका लागि तेस्रो र चौथो टिमबीचको विजेतासँग एलिमिनेटर खेल खेल्नेछ । इपिएलको विजेताले २१ लाख प्राप्त गर्नेछन् ।