बस र रेल मार्ग हुदै बिश्वकप खेल्न गएको नेत्रहिन नेपाली क्रिकेट टोलीलाई हवाई मार्ग हुदै नेपाल फर्काउने नेपाली क्रिकेट समर्थक समाज एनसिएसएसको अभियान सफल भएको छ । रकम अभावमा बस र रेल मार्ग हुदै गएको टोलीलाई हवाई मार्गबाट नेपाल फर्काउन एनसिएसएसले १५ दिन अगाडी सहयोग संकलन थालेको थियो ।
अभियान सफल भएपछि हिजो आइतबार टोली फ्लाई दुबईको विमान मार्फत युएईबाट सिधै नेपाल आएको हो । त्यस्तै आज एनसिएसएसले टोलीलाई नगदसहित सम्मान पनि गरेको छ । आज त्रिबि क्रिकेट मैदानमा विशेष कार्यक्रम गरेर एनसिएसएसले सम्मान गरेको हो ।
एनसिएसएले १५ दिनमा ७ लाख ८७ हजार रुपैयाँ संकलन गरेको थियो । संकलित रकम मध्ये ३ लाख १९ हजार रुपैयाँ खेलाडी तथा अफिसियल सहित २२ जनालाई दुवईदेखि काठमाडौंको टिकट खरिदमा खर्च भएको थियो ।
बाँकी रहेको रकममध्ये आज १४ जना खेलाडीलाई २२ हजार रुपैयाँका दरले ३ लाख ८ हजार र टोलीका ८ जना अफिसियललाई ११ हजारका दरले ८८ हजार रुपैयाँ नगद सहित सम्मान गरिएको अध्यक्ष भानु सिग्देलले जानकारी दिए ।
एनसिएसएसले अभियानलाई सफल पुर्याउन सहयोग पुर्याउने सबैमा हार्दिक आभार प्रकट गरेको छ । अभियानमा राष्ट्रिय टोलीका खेलाडी, पुर्व खेलाडी , बिश्वभर छरिएर बसेका नेपाली क्रिकेटप्रेमीहरुले सहयोग गरेका थिए ।
साथै भबिश्यमा अप्ठेरो परेको बेलामा सहयोग पुर्याउने उदेश्यले एनसिएसएसले एनसिएसएस अक्षयकोषको स्थापना गरेको छ । अक्षयकोषमा रहने रकम नेपाली पुरुष तथा महिला क्रिकेट, नेत्रहिन क्रिकेट र ह्वीलचेयर क्रिकेट खेलाडी तथा क्रिकेट पत्रकारलाई अप्ठेरो परेको बेला खर्च हुनेछ । अक्षयकोषमा एनसिएसएसले ५० हजार १ रुपैयाँजम्मा गरेको छ ।
