अस्ट्रेलियामा जारी एनएसडब्लु प्रिमियर क्रिकेट प्रतियोगिता अन्तर्गत माइकल क्लार्कको वेस्टर्न सबअर्बस बिजयी भएको छ। सन्दिप लामिछाने समेत रहेका वेस्टर्न सबअर्बसले मोस्म्यानलाई ६ विकेटले पराजित गर्यो। टस जितेर ब्याटिंग गरेको मोस्म्यानले ४६.६ ओभरमा सबै विकेट गुमाउदै १४१ रन जोड्यो ।
मोस्म्यानलाई सस्तैमा समेट्ने क्रममा सन्दिपले उत्कृष्ट बलिंग गर्दै ८ ओभरमा केवल १७ रन खर्चेर १ विकेट लिए । उनले कुनै नो बल वा वाइड गरेनन। ५ बलर्स मध्ये लामिछानेले नै सबै भन्दा कम रन खर्चिए ।
१४२ रनको बिजयी लक्ष्य सहित मैदान उत्रेको माइकल क्लार्कको वेस्टर्न सबअर्बसले ३८ ओभरमा ४ विकेटको क्षतिमा विजय लक्ष्य भेट्टायो। जसमा क्लार्कले अविजित ९९ रन जोडे ।
सन्दिप क्लार्क कै बिशेष निमन्त्रणामा अस्ट्रेलिया पुगेका हुन् । उनले त्यहाँ प्रशिक्षणको साथ साथ क्लार्कको क्लबबाट प्रिमियर क्रिकेट प्रतियोगिता समेत खेल्ने छन् ।
