नेपालले पपुवा न्यु गिनी माथि शानदार जित हात पारेको छ । जिम्बावेमा जारी बिश्व कप छनौट प्रतियिगिताको प्ले अफ अन्तर्गत नेपालले ६ विकेटको जित हात पारेको हो । जितको लागि पीएनजीले दिएको ११५ रनको लक्ष्य नेपालले ४ विकेटको क्षतिमा २३ ओभरमा भेट्टायो । नेपाललाई जित दिलाउने क्रममा दिपेन्द्र सिंह ऐरीले सर्बाधिक नट आउट ५० रन जोडे । उनले ५८ बलमा १ चौका र ३ छक्का सहित रन बनाएका थिए । त्यस्तै आरिफ शेखले २६ रन जोडे भने कप्तान पारस खड्काले २० रन जोडे ।
ओपनर ज्ञानेन्द्र मल्ल १ रनमा र अनिल शाह ९ रन मै आउट भए । अन्तिम समयमा आएका रोहित पौडेलले ३ रन जोडे ।
यस अघि पहिले टस जितेर पहिले बलिंग रोजेको नेपालले पीएनजीलाई ११४ रन मै समेट्न सफल भएको थियो । पीएनजीलाई कम स्कोर मै समेट्न दिपेन्द्र र सन्दिप लामिछानेले समान ४-४ तथा सोमपाल कामी र करण केसीले समान १-१ विकेट लिए ।
अब अहिले जारी रहेको नेदरल्याण्ड र हंगकंग बिचको खेलमा नेदरल्याण्डले जितेमा नेपालले एक दिबशीय मान्यता पाउने छ । यदि त्यस खेलमा हंगकंग बिजयी भएमा नेपाल र हंगकंगले अर्को प्ले अफ खेल्ने छ र त्यस खेलको बिजेताले एक दिबशीय मान्यता पाउने छ ।
