युवा स्पिनर सन्दिप लामिछाने क्यारेबियन प्रिमियर लिग खेल्न नेदरल्याण्डबाटै क्यारेबियनतर्फ प्रस्थान गरेका छन्। नेदरल्याण्ड्सविरुद्ध नेपालले खेलेको ऐतिहासिक एकदिवसीय क्रिकेट प्रतियोगितामा सहभागी भई उनी क्यारेबियन प्रिमियर लिग (सीपीएल) खेल्न गएका हुन्।
क्रिस गेलको कप्तानीमा रहेको सीपीएलको सेन्ट किट्स एण्ड नेभिस पेट्रियट्समा आवद्ध सन्दिपलाई क्लबले ५ हजार डलर अर्थात करिब ५ लाख रुपैयामा अनुबन्ध गराएको हो।
आगामी भदौको पहिलो साता मलेसियामा हुने एसिया कप छनोटमा नेपालका तर्फबाट खेल्न सीपीएलका पाँच खेलपछि उनी जाने भएका छन्।यसै सिजनमा आईपीएल क्रिकेटमा दिल्ली डेयरडेभिल्सबाट खेलेका सन्दिपको अन्तर्राष्ट्रिय क्लब क्रिकेटमा व्यस्तता बढेको छ। यसअघि क्यानेडियन लिग खेलेका उनले बिश्व ११ बाट समेत खेल्ने मौका पाएका थिए।
सन्दिपले नेदरल्याण्ड्सविरुद्ध दुई खेलमा महत्वपूर्ण चार विकेटसमेत लिएका थिए। पहिलो खेलमा ४२ रन खर्चिएर १ विकेट लिएका सन्दिपले दोस्रो खेलमा ४१ रन दिएर ३ विकेट लिएका थिए। उक्त जितसंगै नेपालले एक दिबशीय किक्रेट प्रतियोगितामा पहिलो जित हात पारेको छ।