प्रिमियर लिगको बहु चर्चित म्यानचेस्टर डर्बी ४५ दिन अघि मात्र सम्पन्न भएको थियो । जसमा म्यानचेस्टर सिटीले युनाईटेड माथि २-१ को शानदार जित हात पारेको थियो । आज अर्को म्यानचेस्टर डर्बी हुदै छ । तर यस पटक भने प्रिमियर लिगमा नभई लिग कपमा भिड्न लागेका हुन् ।
लिग कप अन्तर्गत अघिल्लो चरणको खेलमा म्यानचेस्टर युनाइटेडले नर्थह्याम्पटनलाई ३-१ ले पराजित गर्दै चौथो चरणमा प्रवेश गर्यो । र चौथो चरणको ड्र मा म्यानचेस्टर युनाईटेडले म्यानचेस्टर सिटी प्रतिद्वन्द्वी पाएको हो । यी दुई बीच क्वाटरफाइनल प्रवेशको लागि आज भिडन्त हुन लागेको हो । यस्तो छ अन्तिम ८ प्रवेशको लागि खेल तालिका । खेल नेपाली अनुसार राती १२:४५ बजे सुरु हुने छ।
यस सिजन म्यानचेस्टरका दुवै क्लबहरुले नयाँ प्रशिक्षक पाएका छन् । सिटीका प्रशिक्षक बार्सिलोनाका पुर्व प्रशिक्षक पेप गार्डिवला छन् भने युनाईटेडका प्रशिक्षकमा जोसे मोरिन्हो छन् । फुटबलमा यी दुईको सम्बन्ध मित्र भन्दा पनि दुश्मनको झैँ चित्रण गर्ने गरिएको छ । कारण मोरिन्हो रियल म्याड्रिड र पेप बार्सिलोनाको प्रशिक्षक हुँदा यी दुईको सम्बन्ध राम्रो रहेन । मोरिन्हो इन्टर मिलनमा रहंदा पेप बार्सिलोना कै प्रशिक्षक थिए । त्यस समय पनि यी दुई बीच कटुतापूर्ण सम्बन्ध रह्यो ।
रोचक कुरा के छ भने सन् १९९६ देखि २००० सम्म यी दुई बार्सिलोनामा आबद्द थिए , जहाँ मोरिन्हो प्रशिक्षकको भूमिकामा थिए भने पेप खेलाडीको । त्यस पछि भने यिनको सबन्ध राम्रो छैन । खेलको समयमा हात मिलाउन पर्दा पनि यी दुई अर्कै तर्फ फर्केर हात मिलाउथे । कटु सम्बध भएपनि यी दुईको प्रदर्शनमा भने प्रतिष्पर्धात्मक छ । पेपले कुल २१ ट्रफी जितेका छन् भने मोरिन्होले २२ ट्रफी जितेका छन् ।
हाल सम्म १७२ म्यानचेस्टर डर्बी भएका छन् । जसमा म्यानचेस्टर युनाईटेडले बाजी मार्दै आएको छ । युनाईटेडले १७२ मध्ये ७१ खेल जितेको छ भने सिटीले ५० खेल मात्र जितेको छ । बाँकी ५१ खेल भने बराबरीमा सकिएका थिए ।