धुर्मुस सुन्तली फाउन्डेसनद्वारा भरतपुरको चितवनमा निर्माण गरिने गौतमबुद्ध अन्तराष्ट्रिय किर्केट रंगशालाका निम्ति फाउन्डेसन र भरतपुर महानगरपालिकाबीच सम्झौतापत्रमा हस्ताक्षर भएको छ। सम्झौतापत्रमा फाउन्डेसनको तर्फबाट अध्यक्ष सिताराम कट्टेल (धुर्मुस) र महानगरपालिकाको तर्फबाट मेयर रेणु दाहालले हस्ताक्षर गरेका छन। सम्झौताअनुसार आगामी ६ महिनाभित्र सम्पूर्ण पूर्वाधार तयार गरि २ बर्षभित्रमा काम सम्पन्न गरि महानगरलाई हस्तान्तरण हुनेछ। रंगशाला त्रिभुवन विश्वविद्यालय अन्तर्गतको कृषि तथा बन बिज्ञान संकायको २० बिघा ६ कट्ठा जागामा बन्नेछ। क्रिकेट रंगशाला बनाउने भएपछि भरपुर महानगर हुँदै फाउन्डेसनलाई उपलब्ध गराएको हो ।
रंगशाला निर्माणको लागत ३ अर्ब अनुमान गरिएको छ । देश–विदेशका नेपालीहरुबाट प्राप्त हुने स्वैच्छिक सहयोगबाट आर्थिक स्रोत जुटाइने फाउन्डेसनका अध्यक्ष धुर्मुसले कार्यक्रममा जानकारी दिए। एक नेपालीको भागमा एक सय रुपैयाँ पर्ने र सबैलाई सहयोगको हातअघि बढाउन फाउन्डेसनले सर्वसाधारणलाई आग्रह गरेको छ। रंगशालाको आर्थिक दायित्व फाउन्डेसनको काँधमा रहेको र जनसहयोगबाटै सम्पूर्ण रकम जुट्ने अपेक्षा गरिएको धुर्मुसले बताए।
देश तथा विदेशबाट आएको सहयोग पूर्ण पारदर्शी रहने धुर्मुसले स्पष्ट पारे । यसका लागि बरिष्ठ सिए मदन शर्मा को नेतृत्वमा लेखा समिति रहेको र सम्पूर्ण हिसाब किताब पूर्ण पारदर्शी हुने बताए । 'पापको खोल ओडेर धरती छोड्न चाहन्न' भन्दै फाउन्डेसनका अध्यक्ष रहेका धुर्मुसले व्यक्ति भन्दा बढेर, फाउन्डेसनभन्दा माथि उठेर, राष्ट्र निर्माणको यस अभियानमा सहयोग गर्न अपिल गरे । उनले यो बिश्व कै मौलिक रंगशाला र नेपालीपन सहितको रंगशाला हुने बताए । साथै उनले यो जनसमुदायबाट बनेको विश्व कै पहिलो रंगशाला बन्ने दाबी गरे ।
उनले शिलान्यास गरेकै दिन हस्तान्तरण मिति घोषणा गरिने बताए । नेपालका विकास निर्माणका परियोजनाहरु समू मै सम्पन्न नभएको अवस्थामा विकासको नयाँ मोडलको उदाहरण पनि पेश गरिने उनले बताए । करिब ३० हजार दर्शक क्षमताको हुने रंगशाला निर्माणमा सहयोगको निम्ति नेपाल इन्भेष्टमेन्ट बैंकमा 'धुर्मुस सुन्तली फाउन्डेसन' नाममा रहेको खाता नम्बर ०४००१०३०२५८७५३ मा सहयोग रकम जम्मा गर्न सकिने फाउन्डेसनले जनाएको छ।
आफुले सरकारलाई चुनौती नदिएको स्पष्ट पार्दै सरकारलाई सहयोग मात्र गरेको बताए ।
हेर्नुस भिडियो :
