स्पेनिस ला लिगा फुटबलमा बार्सिलोनाले आलाभेसमाथि २–० को जित निकालेको छ । मंगलबार राति आलाभेसलाई उसकै घरेलु मैदानमा बार्साले पराजित गरेको हो । बार्साको जितमा काल्र्स एलिना र लुईस स्वारेजले एक/एक गोल गरे ।
यो जितसँगै बार्सिलोना ला लिगाको २६ औं उपाधि नजिक पुगेको छ । ४ खेल खेल्नबाँकी बार्साले एक खेल जिते उपाधि हात पार्नेछ । आगामी खेलमा बार्साले लिभान्टेसँग प्रतिस्पर्धा गर्दैछ ।
बार्सिलोनाले कुनै खेल नखेले पनि उपाधि हात पार्ने अवस्था छ । दोस्रो स्थानमा रहेको एथ्लेटिको मड्रिड बुधबार राती हुने भ्यालेन्सियासँगको खेलमा पराजित भएमा बार्साले कुनै खेल नखेलेपनि उपाधि जित्नेछ ।
ला लिगामा बार्सिलोना ८० अंकसहित शीर्ष स्थानमा छ । दोस्रो स्थानको एथ्लेटिकोको ६८ अंक छ । रियल मड्रिड ६४ अंकसहित तेस्रो स्थानमा छ ।
बार्सिलोना कोपा डेल रे कपको पनि उपाधि नजिक छ । फाइनलमा बार्सिलोनाले भ्यालेन्सियासँग खेल्दैछ ।
