कोपा अमेरिका फुटबल प्रतियोगितामा आयोजक ब्राजिल भेनेजुएलाविरुद्ध गोल रहित बराबरीमा रोकिएको छ । बिहिबार बिहान सकिएको खेलमा ब्राजिलका तीन गोलले मान्यता नपाउँदा नजिता बराबरी निस्किएको हो । गोलरहित बराबरीको नतिजा जारी प्रतियोगीताको पहिलो नतिजा हो ।
पहिलो हाफको ३९औँ मिनेटमा ब्राजिलका रोबर्ट फिर्मिन्होले गोल गरेका थिए । तर, विपक्षी खेलाडीलाई फल गरेकाले सो गोलले मान्यता पाएन । दोस्रो हाफमा पनि ब्राजिलले भेनेजुएलाको पोस्टमा थप दुई गोल गर्यो, तर दुवै गोलले मान्यता पाएनन् । ६०औँ मिनेटमा गाब्रियल जिससले गरेको गोललाई रेफ्रीले अफसाइड दिए । खेलको ६३औँ मिनेटमा फिलिप काउटिन्होले गरेको गोलले पनि ह्यान्ड देखाएपछि मान्यता पाएन ।