च्याम्पियन्स लिगको अन्तिम १६ को पहिलो लेगमा बार्सिलोनाले लज्जास्पद हार बेहोरेको छ । मंगलबार राति भएको प्रि–क्वाटरफाइनलको पहिलो लेगमा बार्सिलोनाले फ्रेन्च लिग वान क्लब पेरिस सेन्ट जर्मेन (पिएसजी)संग ४–० को पराजय बेहोरेको हो ।
पिएसजीलाई जिताउन एन्जल डि मारियाले दुई तथा जुलियन ड्रेक्सलर र एडिसन काभानीले एक एक गोल गरे । बार्सिलोनालाई दबाबमा राखेको पिएसजीलाई जिताउन १८ औं मिनेटमा डि मारिया, ४० औं मिनेटमा ड्रेक्सलर, ५५ औं मिनेटमा पुन: डि मारिया र ७१ औं मिनेटमा काभानीले गोल गरे ।
दोस्रो लेगमा बार्सिलोनाले पिएसजीलाई ५-० वा सो भन्दा उत्कृष्ट नतिजाले हराए मात्र बार्सिलोना क्वाटरफाइनल पुग्न सक्नेछ । त्यसो नगरेमा सन् २००७ पछि पहिलो पटक बार्सिलोना क्वाटरफाइनल नपुगी बाहिरिने छ ।
राति नै भएको अर्को खेलमा बेन्फिकाले बोरुसिया डर्टमुण्डलाई १–० ले हराएको छ । घरेलु मैदानमा भएको प्रिक्वाटरफाइनलको पहिलो लेगमा बेन्फिकालाई जिताउन ४८ औं मिनेटमा कोस्टस मिट्रोग्लोउले गरेको गोल नै निर्णायक बन्यो ।
