यसै महिनादेखि बंगलादेशमा सुरु हुने एसिसी इमर्जिङ नेशन कप क्रिकेटको लागि नेपाली टोलीको घोषणा भएको छ । आइसिसीका प्रतिनिधी वैकटपति राजु, प्रशिक्षक जगत टमाटा, पारस खड्का र कप्तान ज्ञानेन्द्र मल्लको छनौट समितिले अन्तिम टोलीको टुंगो लगाएको हो ।
बिश्व च्याम्पियन्स लिग नखेलेका पारस खड्काले यो प्रतियोगितामा पनि भाग्नालिने भएका छन् । स्वास्थ्यका कारण खड्का नखेल्ने भएपछि कप्तानको जिम्मा ज्ञानेन्द्र मल्ललाई दिइएको छ । नेपाली टोलीको उपकप्तानमा शरद भेषावकर छन्।
मल्लको कप्तानीमा ४ वैकल्पिकसहित १९ जना खेलाडीको घोषणा भएको हो ।
शक्ति गौचन, बसन्त रेग्मी र सोमपाल कामीलाई आराम दिईएको छ ।
टोलीमा ज्ञानेन्द्र मल्ल, शरद भेषवाकार, विनोद भण्डारी, सागर पुन, आरिफ शेख, मेहबुब आलम, दिपेन्द्रसिंह ऐरी, सन्दिप लामिछाने, आषिफ शेख, अविनाश कर्ण, सुनिल धमला, भुवन कार्की, सुशन भारी, दिपेश श्रेष्ठ र दिलिपनाथ रहेका छन् ।
वैकल्पिक खेलाडीमा कुशन भुर्तेल, जितेन्द्र कुमार मुखिया, राजेश पुलामी र सुशील कँडेल रहेका छन् ।
प्रतियोगितामा एसियाका टेष्ट खेल्ने चार राष्ट्र भारत, पाकिस्तान, श्रीलंका र बंगलादेशका यू-२३ टिमसँगै नेपाल, अफगानिस्तान, हङकङ र मलेसियाको सहभागिता रहने छ ।
नेपाली टोलीको बन्द प्रशिक्षण आगामी आइतबारबाट सुरु हुने भएको छ।
प्रतियोगिता मार्च २५ देखि अप्रिल ४ तारिखसम्म चल्ने छ ।