बहु चर्चित इन्डियन प्रिमियर लिग आईपिएल् क्रिकेट प्रतियोगिताको उपाधि छिनोफानो आज हुदै छ । आज राती ८ बजे हुने फाइनल खेलमा मुम्बई इन्डियनस र राईजिंग पुने सुपर जयन्टले प्रतिस्पर्धा गर्ने छन् ।
मुम्बई रोहित शर्माको कप्तानीमा छ भने पुने अस्ट्रेलियन क्रिकेटर स्टिभ स्मिथको कप्तानीमा रहेको छ । यस सिजन समुह चरणका १४ मध्ये १० खेलमा जित हात पार्दै शिर्ष स्थान रहेर मुम्बई प्ले अफमा प्रवेश गरेको हो । तर पहिलो क्वालिफायरमा पुने संग पराजित भएपछि दोस्रो क्वालिफायरमा कोलकातालाई हराएर मुम्बईले फाइनलमा स्थान पक्का गरेको हो । पुने भने समुह चरणका ९ खेल जित्दै दोस्रो स्थानमा रहेर प्ले अफ प्रवेश गरेको हो । पूणेले लिग चरणको दुवै खेल र फाइनल प्रवेशका लागि भएको क्वालिफायरमा मुम्बईलाई पराजित गरेको हो ।
यस अघि २ उपाधि जितेको मुम्बईले आजको खेल जित्दै ३ पटक उपधि जित्ने पहिलो टोली बनेर इतिहास बनाउने दाउमा छ । उता पुने भने पहिलो उपाधिको खोजिमा हुने छ । मुम्बई आइपिएलमा तेस्रो पटक फाइनलमा पुगेको हो भने पूणे आइपिएलमा समावेश भएको दोस्रो वर्षमा फाइनल प्रवेश गरेको हो। मुम्बईले २०१३ र २०१५ मा उपाधि जितेको थियो भने २०१० मा उप बिजेता मै सिमित बनेको थियो ।
खेल गत सिजनको च्याम्पियन हैदरावादको घरेलु मैदानमा हुने छ ।
