युरोपा लिगको उपाधि जित्दै म्यान्चेस्टर युनाइटेडले च्याम्पियन्स लिगको अर्को सिजनको च्याम्पियन्स लिगमा स्थान सुरक्षित गरेको छ । युनाइटेडले गएरातिको फाइनलमा डच टोली आयक्सलाई २-० गोल अन्तरले पराजित गर्दै लिगमा स्थान पक्का गरेको हो ।
युनाइटेडलाई १८औं मिनेटमा पाउल पोग्वाले गोल अग्रता दिलाएका थिए । पहिलो हाफमा १-० ले अघि रहेको युनाइटेडले दोस्रो हाफमा अर्को गोल थप्यो । दोस्रो हाफको तेस्रो मिनेटमा स्मलिङको पासमा एमखितार्यनले गोल गर्दै जित सुनिश्चित गरे ।
लिगको छैटौं स्थानमा रहँदै इंग्लिस पि्रमियर लिग सकाएको युनाइटेड युरोपा लिगको बिजेताको रुपमा च्याम्पियन्स लिगमा छनौट भएको छ ।
अब आगामी सिजनको च्याम्पियन्स लिगमा प्रिमियर लिगबाट चेल्सी, टोटनहम, म्यानचेस्टर सिटी, म्यानचेस्टर युनाइटेड र लिभरपुलले सहभागिता जनाउने छन् । प्रिमियर लिगमा चौथो स्थानमा रहे पनि लिभरपुलले छनौट चरण पार गरेर मात्र च्याम्पियन्स लिग खेल्न पाउने छ । उता पाचौ स्थानमा रहेर लिग सकाएको आर्सनलले भने अब च्याम्पियन्स लिग खेल्न नपाउने भएको छ ।
यूएफाले सन् २०१४ मा ल्याएको नयाँ नियम अनुसार युरोपा लिगको बिजेताले च्याम्पियन्स लिगमा सिधै स्थान बनाउने छ । यहि आधारमा म्यानचेस्टर युनाइटेड लिगमा छैठौ भएपनि च्याम्पियन्स लिगमा स्थान पक्का भएको हो । एक लिगबाट सर्बाधिक ५ टोली च्याम्पियन्स लिगमा छनौट हुने पाउने नियम अनुसार आर्सनल पछि परेको हो । यदि म्यानचेस्टर युनाइटेडले युरोपा लिग नजितेको भए आर्सनल छनौट चरण पार गर्दै च्याम्पियन्स लिगमा सहभागिता जनाउने थियो । अब आर्सनलले अर्को सिजनको युरोपा लिग खेल्ने छ ।