संयुक्त अरब इमिरेट्स (युएई) मा सन् २०१९ मा हुने एएफसी एसियन कप छनोट प्रतियोगिता अन्तर्गत आज नेपाल र यमन भिड्दै छन् । प्रतियोगिताको छनोट चरणको पहिलो खेलमा नेपाल फिलिपिन्ससँग पराजित भएको थियो ।
नेपालले घरेलु मैदानमा यमनसंग प्रतिस्पर्धा गर्न लागेको हो । सशस्त्र प्रहरी बलको खेल मैदान हल्चोकमा दिउँसो ३ बजे खेल सुरु हुने छ ।
नेपालले यस अघि दुई पटक यमनसंग खेलेकोमा दुवै पटक पराजित भएको थियो । सन् २००० मा एएफसी एसियन कपमै नेपाल यमनसँग ३–० गोल अन्तरले पराजित भएको थियो । यस्तै सन् २०१४ मा अन्तर्राष्ट्रिय मैत्रीपूर्ण खेलमा नेपाल यमनसँग २–० गोल अन्तरले पराजित भएको थियो ।
नेपालका मुख्य प्रशिक्षक योतुकु कोजीले यमनविरुद्धको खेलमा नेपाली टोली तयार रहेको बताएका छन् । कोजीले यमनविरुद्धको खेलमा आफ्नो टोलीले उत्कृष्ट प्रदर्शन गर्ने आशा व्यक्त गर्दै यमन गाह्रो प्रतिद्वन्द्वी रहेको टिप्पणी गरे । उक्त प्रतियोगिताको तयारीका लागि नेपालले एक साताअघि भारतसँग मैत्रीपूर्ण खेल खेलेको थियो जसमा नेपाल भारतसँग २–० गोलअन्तरले पराजित भएको थियो ।
फिफा वरियतामा यमन नेपालभन्दा ४५ स्थान अघि छ । नेपाल १ सय ६९ औँ स्थानमा छ भने यमन १ सय २४ औँ स्थानमा छ ।
यता यमनका प्रशिक्षक इब्राहिम मेब्रातोल र कप्तान अरस मोहम्मद इब्राहिमले आफूहरु नेपालसँग खेल्न शारीरिक तथा मानसिक रुपमा तयार रहेको बताए ।
यस्ता छन् पहिले मैदान उत्रने नेपालका ११ खेलाडी ।
गोल किपर: किरण चेम्जोङ
डिफेन्स : विराज महाराजं, आदित्य चौधरी, अनन्त तामाङ, कमल श्रेष्ठ
मिड फिल्ड : बिशाल राइ, सुजल श्रेष्ठ, रोहित चन्द, अन्जन बिष्ट
फरवार्ड : भारत खवास, नवयुग श्रेष्ठ
