वीरगञ्ज–काठमाडौ विद्युतीय रेलमार्गको सम्भाव्यता अध्ययनका लागि परामर्शदाता (कन्सल्टेन्ट) कम्पनी छनोटको काम अन्तिम चरणमा पुगेको छ ।
भौतिक पूर्वाधार तथा यातायात मन्त्रालय अन्र्तगतको रेल विभागले सम्भाव्यता अध्ययनका लागि प्रारम्भिक छनौटमा ६ वटा कम्पनी परेको र आगामी १५ दिनभित्र परामर्शदाता कम्पनी छनौटको काम सकिने बताएको छ ।
रेल विभागले काठमाडौ–वीरगञ्ज विद्युतीय रेलमार्गको सम्भाव्यता अध्ययन गर्न २०७३ मंसिरमा आव्हान गरेको ग्लोवल टेण्डरमा २० भन्दा बढी कम्पनीले आवेदन दिएका थिए ।
विभागले प्रारम्भिक छनौटमा परेका कम्पनीसँग प्राविधिक प्रस्ताव माग गरेको छ । त्यसमध्ये उत्कृष्ट एक कम्पनी परमर्शदातामा नियुक्त हुनेछ । अध्ययनमा न्यूनतम लागत, उत्कृष्ट प्रविधि र कम्पनीको अनुभवलाई आधार मानेर परामर्शदाता छान्ने विभागले जनाएको छ । छनोट भएको कम्पनीले छ महिनामा काठमाडौं–वीरगञ्ज रेलमार्गको सम्भाव्यता अध्ययन गरी सरकारलाई प्रतिवेदन बुझाउनेछ ।
विभागले रेलमार्ग एक सय किलोमिटर लामो हुने अनुमान गरेको छ ।