नेपाल टेलिकमले ल्याण्डलाइन टेलिफोनमा लाग्दै आएको केहि सेवाहरु निशुल्क प्रदान गर्ने निर्णय गरेको छ । टेलिकमले फोन गरेको नम्बर देखिने सुविधा (कलर आईडी) सेवा , कल डाइभर्ट सुविधा निशुल्क गरेको हो ।
साउन १ गतेबाट यी सेवाहरु निशुल्क गरिएको नेपाल टेलिकमले जनाएको छ । अब ल्याण्डलाइन टेलिफोनमा कलर आईडी सेवा निशुल्क पाइने छ । यस्तै आइएसडी सेवा आफैंले बन्द गर्न र खोल्न सकिने, बारम्बार डायल गर्नुपर्ने नम्बरलाई कुनै दुई अंकमा सेभ गरी त्यही दुई अंक थिचेर नम्बर डायल गर्न सकिनेछ । साथै एउटामा आउने सम्पूर्ण कल अर्को नम्बरमा डाइभर्ट हुने र कल ट्रान्सफर सुविधा पनि निःशुल्क भएको छ ।
टेलिफोन ब्यस्त हुँदा आउने कल अर्को नम्बरमा डाइभर्ट हुने बिजी कल ट्रान्सफर, ६ पटकसम्म घण्टी बजेपनि फोन नउठेमा अर्को नम्बरमा डाइभर्ट हुने ‘नो एन्सर ट्रान्सफर’, आवश्यक पर्ने समयमा अलार्मको रुपमा टेलिफोनमा घण्टी बजाउन वा समय सूचकको रुपमा प्रयोग गर्न सकिने ‘वेक अप कल’ र टेलिफोनमा कुरा भइरहेको बेला अर्को कल आएको थाहा पाउन प्रयोग गरिने ‘कल वेटिङ’ सुविधा पनि निःशुल्क भएको छ ।
त्यस्तै ग्राहकले टेलिफोन सेटमा आफूले राखेको लकिङ कोड आफैले टेलिफोन सेटबाट निशुल्क परिवर्तन गर्न सक्ने छन् । कलर आईडी सुविधा लिनका लागि दूरसञ्चार कार्यालयमा सम्पर्क गर्नु पर्ने नेपाल टेलिकमका प्रवक्ता प्रतिभा वैद्यद्वारा जारी विज्ञप्तिमा उल्लेख छ ।